Meclîsa Gel a Serdeşta Çiyayê Şengalê û Meclîsa TAJÊ ya Şengalê ji bo piştgiriya Rojava daxuyaniyeke çapemeniyê dan. Di daxuyaniyê de tevî berf û seqemê jî zarokên Êzidî jî amade bûn.
Destpêkê bi navê TAJÊ dayê Kinê Xidir axivî û pişstgiriya gelê Şengalê ya ji Rojava nîşan da. Dayê Kinê Xidir got: “Heya dilopek xwîn di laşê me de mabe, emê li pişt gelê xwe yê Rojava bin. Em berxwedêrên di şertên zehmet de tî, birsî û di nava seqemê de têdikoşin, silav dikin. Di şexsê hevala Denîz û hevalê Ziyad de em bejna xwe li ber hemû şehîdên Rojava ditewînin.”
Dayê Kinê diyar kir mirovahiya ku li berxwe dide wê serbikeve û wiha dirêje bi axaftina xwe da: “Cîhan bibe yek jî fikrê Rêber Apo tu carî nakeve û wê her li berxwe bide. Fikrê Rêber Apo li Kobanê li berxwe da, serket. Li Helebê serket. DAIŞ hate Şengalê Êzidî li berxwe dan DAIŞ’ê şikandin. Yên mirovahiyê dixwazin li kuderê bin wê biserbikevin.’’
Dayê Kine di dawiya axaftina xwede careke din piştgirî da berxwedana gelê Rojava û vê peyamê da: “Êzidiyek, Kurdek li ku be dibêjin bikûjin. Ne Êzidî serî ditewînin û ne jî Kurd serî ditewînin. Em bi can û her tiştê xwe li gel gelê xwe yê Kobanê û Rojava ne, tişta ji dest me were emê bikin.”
Hevserokê Meclîsa Gel a Serdeştê Mirad Biro jî diyar kir ku çeteyekî gelan qir kiriye kirine serokê dewletê û wiha axivî: “Em li vir kom bûne ji bo piştgiriya xwe ya ji bo gelê Rojava bidin nîşan. 2014’an bi her awayî bi gelê Şengalê ve hatin û alîkarî kirin. Gelê me yê Kobanî niha di nava zehmetiyeke mezin de ne, heya niha 5 zarok şehîdbûne. Saziyên Mafê mirovan bêdengin û mirovahî nemaye. Ehmed Şera 2014’an cehş bû. Hemû gelan di komkujiyê re derbas dikir.”
Mirad Biro da zanîn xeterî li ser pêkhateya Şîe û Êzidiyan jî heye û axaftina xwe wiha bi dawî kir: “Îro Kurdan qetil dikin, sibe wê Şîeyan jî qetil bikin. Bila Şîe nebêjin, wê tiştek ji me nekin. Kîjan gel ber Ehmed Şera bikeve wê qetil bike. Ew ne tenê li desthilatek digere, ew xwedî fikreke cehş a ne mirove. Heta meleyên misilman jî jêre nabêjin, ev xwedî fikreke mirovî ye. Îro li Rojavaye wê sibe li Başûr, du sibe li Şengalê be. Daxwaza me ewe her bi çi awayek be em piştgiriya gelê xwe yê Rojava bikin. Em serkeftinê ji gelê xwe yê Rojava re dixwazin.”
