Şaxa ÎHD’ê ya Amedê û xizmên windayan di hefteya 850’an a çalakiya xwe de li ber Bîrdariya Yaşam Hakki ya li Parka Koşûyolû hatin ba hev. Di çalakiyê de wêneyên windayan hatin hildan. Endamên ÎHD’ê û xizmên windayan beşdarî çalakiyê bûn. Di çalakiyê de faîlên Selîm Orhan (46), Hasan Orhan (40) û Cezayîr Orhan (17) hatin pirsîn ku 24’ê Gulana 1994’an di bin çavan de hatin windakirin û piştre hestiyên wan ji goreke komî derket.
Endama Komîsyona Windayan a Şaxa ÎHD’ê ya Amedê Berfîn Elçî çîroka Selîm Orhan (40) û Cezayîr Orhan (17) xwend.
Daxuyanî piştî çalakiya rûniştinê bi dawî bû.
ÊLIH
Li Êlihê parêzvanên mafan û xizmên windayan, di hefteya 686’an a çalakiya xwe de li ber Bîrdariya Mafên Mİrovan a li Cadeya Gulistan hatin ba hev. Di çalakiyê de aqûbeta Zekî Dîrîl (16) û xizmê wî îlyas Dîrîl (12) hate pirsîn ku 2’yê Gulana 1994’an dema diçûn Şirnexê di nuqteya leşkeri de hatin binçavkirin, piştre birin Qereqola Jendermeyan û piştre êdî agahî ji wan nehat girtin.
Hevseroka Şaxa ÎHD’ê ya Êlihê Rumeysa Denîz Kaya çîroka Dîrîlan xwend.
Daxuyanî piştî çalakiya rûniştinê bi dawî bû.
COLEMÊRG
ÎHD û xizmên windayan li navçeya Gever a Colemêrgê çalakiya xwe ya 176’emîn lidar xistin. Çalakî li Kolana Sanat hate kirin. Di çalakiyê de kujerên Namik Erdogan hatin pirsîn ku 9’ê Gulana 1994’an ji aliyê hêzên dewleta Tirk ve hate binçavkirin û piştre hate qetilkirin.
Daxuyanî bi çalakiya rûniştinê re bi dawî bû.
