AMED: Xizmênwindayan û Şaxa ÎHD’ê ya Amedê di hefteya 863’yan a çalakiya xwe ya bi şîara “Bila winda bên dîtin, faîl bên darizandin” de, li ber Bîrdariya Mafê Jiyanê ya li Parka Koşuyolu kom bûn. Di çalakiyê de pankarta ku wêneyên windayan li ser bûn, hate vekirin. Xizmên windayan û endamên ÎHD’ê beşdarî çalakiyê bûn. Di çalakiyê de aqûbeta Mehmet Salîm Acar (31) hate pirsîn ku 20’ê Tebaxa 1994’an li taxa Ambar a navçeya Bismil a Amedê ji aliyê hêzên dewleta Tirk ve hate binçavkirin û êdî agahî jê nehat wergirtin.
Ji bo kesên di bin çavan de û bi zorê hatine windakirin, çalakiya rûniştinê hate lidarxistin.
ÊLIH: Şaxa ÎHD’ê ya Êlihê û xizmên windayan di hefteya 699’an a çalakiya xwe de, li ber Bîrdariya Mafên Mirovan a li Cadeya Gulistan hatin ba hev. Di çalakiyê de pankarta “Bila winda bên dîtin, faîl bên darizandin” hate vekirin, ji xeynî parêzvanên mafên mirovan gelek kes beşdarî çalakiyê bûn.
Di çalakiya vê hefteyê de çîroka Alî Gunduz hate xwendin ku 22’yê Tebaxa 1998’an dema ji gundê Helanê yê navçeya Kercews ê Êlihê hate navenda Êlihê, êdî agahî jê nehate wergirtin.
Daxuyanî bi çalakiya rûniştinê bi dawî bû.
