Di daxuyaniya ESU’yê de hate diyarkirin ku gefên mîna êrîşên DAÎŞ’ê yên sala 2015’an car tên rojevê û hate bibîrxistin ku di wê demê de 36 gundên Suryanî yên li Geliyê Xabûr bi temamî hatin tunekirin û bi hezaran kes bi zorê ji cihên xwe hatin kirin.
Di daxuyaniyê de hate ragihandin ku tevî hilweşîna mezin jî gelê Suryanî bi berxwedan û biryardariyeke mezin hewl da gundên xwe jinûve ava bike û hate diyarkirin ku îro komên çekdar ên ku îdeolojiya DAÎŞ’ê didomînin, car din amadekariya êrîşê dikin, ev yek fikareke kûr çêdike.
ESU destnîşan kir ku rewşa li Xabûrê tenê meseleya ewlehiyê nîne û got, hebûna çandî, dîrokî û demografîk a gelê Suryanî rasterast tê hedefgirtin.
Bang li civaka navneteweyî, rêxistinên mafên mirovan û hemû saziyên eleqedar hate kirin ku ji bo parastina sivîlên li herêma Xabûr demildest bikevin nava liv û tevgerê.
Hate diyarkirin ku ji bo astengkirina karesateke mirovî ya muhtemel, divê gavên pêwîst bên avêtin.
ESU’yê her wiha di daxuyaniya xwe de destnîşan kir ku ji bo parastina aştiya herêmê û cûreyên çandî, piştevaniya navneteweyî û mudaxileya dîplomatîk pêwîst e.
Yekîtiya Suryaniyan a Ewropayê destnîşan kir ku parastina gelê Xabûr berpirsyariya hemû mirovahiyê ye û hişyarî da ku bêdengî zemînê komkujiyên nû çêdike.
