Yekîtiya Jinên Kurd ên Skandînaviyayê (YJK), li dijî êrîşên li ser Rojava daxuyaniyek nivîskî weşand.
YJK’ê, destnîşan kir ku gelê Kurd li Rojava careke din di bin gefa tundiyê û komkujiya sîstematîk de ye û got, “Azadî û şoreşa jinan di bin dorpêçeke giran de ne. Kobanê di navenda êrîşan de ye. Kobanê sembola rizgariya jinan û berxwedana li dijî faşîzmê ye. Ew sembola têkoşîna dîrokî ya li dijî DAÎŞ’ê û jiyana nû ya ji hêla jinan ve tê rêvebirin e. Îro, bajar bi çekên giran, êrîşên hewayî û hêzên paramîlîter tê hedefgirtin.
Aliyê herî hovane yê êrîşan li dijî şervanên jin ên Kurd e. Jin tên kuştin û laşên wan tên tehşîrkirin. Birîna por û belavkirina dîmenên înfazkirinê, sûcekî şer ê eşkere û qirkirina jinan e. Armanc ew e ku îradeya jinan were şikandin û têkoşîna wan a ji bo azadiyê were tunekirin.”
YJK’ê, da zanîn ku ev sûc li ber çavên cîhanê tên kirin û got ku civaka navneteweyî û rêxistinên mafên mirovan nikarin helwestek bi bandor bigirin û bêdeng dimînin. YJK’ê, anî ziman ku ev bêdengî rê li ber berdewamiya van sûcan vedike.
YJK’ê, diyar kir ku şoreşa jinan a li Rojava ne tenê ji bo gelê Kurd, di heman demê de ji bo hemû jinên cîhanê serketinek e û wiha domand, “Ev pergala ku li ser bingeha wekhevî û azadiyê hatiye avakirin li hemberî pergala baviksalarî alternatîfa herî bihêz û ji ber vê yekê ew tê hedefgirtin.”
Yekîtiya Jinên Kurd ên Skandînaviyayê, ragihand ku ew ê li hember vê hovîtiyê bêdeng nemînin û bang li hemû jinan, femînîstan û parêzvanên mafên mirovan kir ku hevgirtina xwe bi Rojava re nîşan bidin.
YJK’ê got, “Jinên ku li Kobanê li ber xwe didin ne tenê axa xwe, di heman demê de rûmeta mirovahiyê jî diparêzin. Têkoşîna jinan ji bo azadiyê gerdûnî ye. Ev dem ne dema bêdengî û tirsê ye, dema hevgirtin, berxwedan û xwedîderketinê ye. Ji ber ku heke Kobanê bikeve, hêviya hevpar a mirovahiyê jî dê birîndar bibe.”
