Navenda Ragihandin û Çapemeniyê ya Yekîneyên Parastinê yên Rojhilatê Kurdistanê (YRK) nasnameya gerîlaya Hêzên Parastina Jinê yên Rojhilatê Kurdistanê (HPJ) a ku di sala 2025’an de şehîd bû eşkere kir û ev tişt diyar kir:
“Ji Çapemenî û Raya Giştî re;
Em bi xemgîniyeke mezin şehadeta gerîlayeke HPJ’ê ya bi navê Cîhan Pepûle ku pêşenga Şoreşa Jin Jiyan Azadî ye û ewladeke bi nirx a ji Rojhilatê Kurdistanê ye radigihîn in. Hevrêya me dema ku li ser erka xwe ya şoreşgerî bû, di encama qezayeke bê dem de di 22’yê Hezîrana 2025’an de gihişt asta şehadetê.
Di serî de em ji malbata hevrêya xwe û di şexsê gelê esîl ê Hewraman de, ji tevahiya gelê xwe yê welatparêz ê Kurdistanê re sersaxiyê dixwazin. Em careke din soz û peymana xwe dubare dikin ku têkoşîna hevreyên xwe bigihînin serkeftinê.
Nasnameya hevrêya me ya şehîd bi vî rengî ye:
Nasnav: Cîhan Pepûle
Nav û Paşnav: Sena Ibrahîmya
Cihê Jidayikbûnê: Hewraman
Dayîk-Bav: Çîmen – Eywez
Dem û Cihê Şehadetê: 22’yê Hezîrana 2025 – Pêncewîn
Di derbarê jiyana Hevrêya me Cîhan Pepûle de;
Hevrêya me zarokek bi nirx û qîmet a civaka me ya Hewraman e. Di nava xweşikbûnek weke Hewraman de çavê xwe li dinyayê vedike. Bi nirxên mezin û paqij, gelê me li wê herêmê zarokên xwe perwerde dikin. Li ser wî esasî hevrêya me jî zarokek bi wî rengî bû ku di nava refên gerîla de jî, her tim xwedî li wê nirxê derdiket û mezin dikir. Keçeke çiyayî bû, di nava xwezaya Koselan û Şaho de mezin bibû û hatibû perwerdekirin. Ji nirxên civaka xwezayî dûr neketibû, ew nirx di cewhera xwe de parastibû. Zaroka herêmekê bû ku hîn zarokên xwe, li ser çanda Kurdayetî ya bi nirx mezin perwerde dikin.
Hevrêya me Cîhan Pepûle, ji beşdarbûna xwişka xwe û di herêmê de ji dîtina hevalan di sala 2015’an de, bandor dibe û tevgera Apoyî nas dike. Beriya beşdar bibe çand û jiyana gerîla nas dike, bi zanebûneke mezin di sala 2018’an de berê xwe dide nava refên Gerîlayên Azadiya Kurdistanê û tevlî nava fikir û felsefeya Rêber Apo dibe. Êdî dibe gerîlayeke jin a ku li beramber qêrîna her jinekê xwe berpisyar dibîne û diparêze. Dibe cîhana azad û xwe nêzî her jineke ku zilm û zordestî li ser tê meşandin dike. Li ser wî esasî di nava refên me de her tim tijî û bi wate jiyan kir.
Piştî beşdarbûn û bi cih anîna gelek kar û xebatên di nava gerîla de, wek gerîlayeke jin ji bo ku di xwe de pisporbûnê pêş bixe, di sala 2020’an de bi armanceke mezin berê xwe dide dibistanên pisporiyê û branşa sabotajê dibîne. Bi dîtina xwe ya ji branşa sabotajê re, êdî di hêla taktîk û stratejîk de dibe xwedî zanebûneke mezin û ji bo her derê amade dibe.
Li ser wî esasî di heman salê de berê xwe dide, cihê lê ji dayîk bûye û li alanên Mukiryan, ji gelek xebatan re pêşengtiyê dike. Di rêxistinkirina gelê me yê wê herêmê de, ked û xebateke bê hempa ya hevrêya me çêdibe. Di dema Şoreşa Jin Jiyan Azadî de pêşengtî dike û ji bo birêxistinkirina gel hewldaneke mezin dide. Pratîkeke bê hempa dide meşandin.
Di nava refên me de, bi zanebûna ku di xwe de ava kirî û bi hevrêtiya ku meşandiye re, bû kesayeteke nimûne. Ji her xebatê re dikarîbû pêşengtiyê bike û serkeftinê bi dest bixe. Di xebatên rêxistinkirina gelê me yê Rojhilatê Kurdistanê de, hevrêya me xwedî rencekî mezine, ji bo me mîraseke ku her tim em jê re bibin layiq û lê xwedî derbikevin hişt.
Hevrêya me bi sekn, hevaltî û jiyana xwe karî bibe nûnera rasteqîn û li ser şopa Şehîd Aryen Arê, Kawenda Agirî, Cîhan Azad heta dawî meş û milîtantiya xwe ya jina azad bi serkeftî pêk anî. Her tim di wê rexnedayînê de bû ku hevaltiya kêm a bi Rêber Apo re temam bike. Wê sekn û jiyana hevrêya me, ji bo me mînaka bê dawî ya jiyan û têkoşînê be.
Li ser vî esasî careke din em ji malbata hevrêya xwe û ji hemû gelê Kurdistanê yê welatparêz re sersaxiyê dixwazin û careke din soza xwe ya ji bo bi cih anîna xeyalên hevrêyên xwe yên mîna Cîhan Pepûle û bi dehan hevalên me yên ku di vê riyê de têkoşîn dane meşandin, dubare dikin. Weke Hêzên Parastina Jinên Rojhilatê Kurdistanê – HPJ, heta dawî em ê li ser vê mîrasê, ji bo Rojhilatekî azad kar û têkoşîna xwe bidin meşandin.”
