Volodimir Zelenskiy li ser platforma medya dîjîtal X’ê daxuyaniyek da û ragihand ku Rûsya li herêma Voronej a nêzî sînorê Ûkraynayê ji bo pêşwazîkirina 30 hezar leşkerên li Koreya Bakur bên, ji meha Hezîranê û vir ve amadekariyê dike.
Zelenskiy her wiha îdîa kir ku rêveberiya Pyongyangê amadekariyê dike ku fuzeyên nû yên balîstîk bide Rûsyayê.
‘TECRÛBEYA ŞER JI KROEYA BAKUR RE TÊ DAYIN’
Zelenskiy îdîa kir ku şerkirina leşkerên Koreya Bakur li nava refên Rûsyayê ne tenê Ûkraynayê eleqedar dike û got, Moskow tecrûbeya şer dide Pyongyangê.
Zelenskiy ragihand ku ev yek tevkariyê li Koreya Bakur dike ku çekan bi pêş ve bibe û kapasîteya xw eya fuzeyan zêde bike û got, ji bo welatên li Asyayê ev yek gefa ewlekariyê ye.
HEVKARIYA NAVBERA DU WELATAN XURT DIBE
Daxuyaniya Zelenskiy piştî serdana Wezîrê Karên Derve yê Koreya Bakur Choe Son Hui ya li Moskowê hate dayin. Di dema serdanê de rêveberiya Pyongyangê diyar kiribû ku ew “piştgiriyeke tam û xurt” didin polîtîkaya Rûsyayê ya li Ûkraynayê.
Rûsya û Koreya Bakur ji destpêka şerê Ûkraynayê yê sala 2022’an û vir ve hevkariya xwe ya leşkerî gelekî zêde kiriye. Tê zanîn ku Pyongyangê beriya niha bi hezaran leşker şand herêma Kurskê û çek û cebilxane da Rûsyayê.
DI BERDÊLA WÊ DE TEKNOLOJIYA LEŞKERÎ Û PIŞTGIRIYA ABORIYÊ
Li gorî rayedarên Koreya Başûr heta niha nêzî 2 hezar leşkerên Koreya Bakur di şer de jiyana xwe ji dest dan. Hêzên Ûkraynayê heta niha tenê du leşkerên Koreya Bakur bi saxî zevt kiriye.
Pispor dibêjin, di berdêla vê piştgiriya leşkerî ya Koreya Bakur de Rûsya alîkariya malî, teknolojiya leşkerî, çavkaniyên xurek û enerjiyê dide Koreya Bakur. Herdu welatan di sala 2024’an de peymaneke leşkerî mohr kirin, ku li gorî vê peymanê eger êrişke li ser aliyekî bibe, aliyê din wê yekser bêyî derengmayinê piştgiriya leşkerî bide.
Rûsya û Koreya Bakur li ser îdîayên dawî yên Zelenskiy hîn daxuyaniyeke fermî nedane.
