Di çarçoveya 10-17’ê Kanûnê Hefteya Mafên Mirovan de li gelek bajaran çalakî hatin lidarxistin.
AMED
Baroya Amedê, Komeleya Mafên Mirovan (ÎHD), Komeleya Jinan a Rosayê, Weqfa Mafên Mirovan a Tirkiyeyê (TÎHV), Komeleya Hiqûqnasên ji bo Azadiyê (OHD) û Odeya Bijîşkan bi boneya Hefteya Mafên Mirovan çalakiya hevpar li dar xistin. Di çarçoveya çalakiyê de ji Qada Şêx Seîd heta Deriyê Sarayê meş hat lidarxistin. Di meşê de pankarta “Aştî, bi mafên mirovan pêkan e” hate hilgirtin. Di meşê de gelek caran dirûşmên “Na ji şer re aştî a niha” û “Jin, jiyan, azadî”hatin berzkirin.
Daxuyaniya hevpar, ji hêla Sekreterê Şaxa ÎHD’ê Omer Saman ve hate xwendin. Saman, bal kişand ser êrîşên li ser Sûriye û Bakur û Rojhilatê Sûriyeyê û wiha got: “Ji bo gel, bawerî û tevahiya derdorên civakî yên Sûriyeyê beşdarî pêvajoya çareserî û muzakereyan a îxtîmal bibin, hewceye civaka navneteweyî, Tirkiye û hemû aktor li hemberî Rojava xwedî helwesteke aştiyane bin. Civaka navneteweyî ku armanca wê ya esasî aştî û ewlehiya seranserî cîhanê ye, careke din divê ji bo pêşîlêgirtina mirina sivîlan û wêraniyê, ji bo pêşîlêgirtina şer û pevçûnan bi erka xwe rabin.”
Saman, binpêkirinên li welêt rêz kir û wiha bal kişand ser tecrîda girankirî ya li ser Rêber Apo, “Yek ji binpêkirina girîng a li girtîgehan jî, di serî de li Girtîgeha bi Ewlekariya Bilind a Îmraliyê, sepana tecrîdê ya di meriyetê de ye. Sepanên li girtîgehan ên ji bo şexsan bi taybet di meriyetê de, li dijî feraseta mafên mirovan e. Tecrîd û îzolasyon, binpêkirina peymanên neteweyî û navneteweyî ye û divê tavilê ev sepanên ne qanûnî bên bidawîkirin. Bi sala ye li ser Rêberê PKK’ê Abdullah Ocalan ê li Girtîgeha Girava Îmraliyê tê ragirtin, tecrîdeke girankirî heye. Piştî tecrîdeke domdirêj, di 23’yê Cotmeha 2024’an de hevdîtinek hate kirin. Divê sepanên tecrîdê û hemû astengiyên li pêşiya mafên Abdullah Ocalan bi temamî bên rakirin û ji bo çareseriya demokratîk û aştiyane ya meseleya Kurd, muzakere bên destpêkirin. Di heman demê de divê astengiyên li pêşiya hevdîtina bi parêzer û malbatan a bi girtî Veysî Aktaş, Omer Hayrî Konar û Hamîlî Yildirim ên li Girtîgeha Girava Îmraliyê tê ragirtin jî bên rakirin.
Weke encam; em bang li Tirkiyeyê ya aliyeke Beyannameya Gerdunî ya NY’ê ye dikin ku di her şert û mercan de, bêyî cihêkariyê di navbera ziman, ol, nîjad, netew, zayend, etnîk û çandan de bike, berpirsyartiyên xwe yên peymanê bi cih bîne. Em careke din dibêjin ku mafê jiyanê pîroz e û hêviya jiyaneke hêjayî rûmeta mirovahiyê û azad dikin.”
RIHA
Navenda Mafên Mirovan a Rihayê, şaxên OHD û ÎHD’ê jî bi heman boneyê li pêşiya Baroya Rihayê daxuyaniyeke hevpar dan. Gelek kes beşdarî daxuyaniyê bûn. Serokê Baroya Rihayê Abdullah Oncel bal kişand ser êrîşên ser Rojava û banga “Pêşî li van komkujiyan bigirin” kir.
Bi heman boneyê li Dersim, Êlih, Stenbol, Edene, Mêrsîn, Hatay, Mêrdîn û gelek bajarên din jî çalakî hatin lidarxistin. Di çalakiyan de binpêkirinên li girtîgehan, tecrîda li ser Rêber Apo û binpêkirinên din ên mafan hatin protestokirin. Di heman demê de êrîşên ser Bakur û Rojhilatê Sûriyeyê jî hatin şermezarkirin û wiha hate gotin:
“Neçareserkirina pirsgirêka Kurd, mezintirîn astengiya li pêşiya demokratîkbûna Tirkiyeyê ye û divê bi rêyên aştiyane û demokrasiyê were çareserkirin.”
DEM PARTÎ DAXUYANÎ DA
Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tuncer Bakirhan bi boneya 10’ê Kanûnê Hefteya Mafên Mirovan li ser hesabên xwe yên platforma X’ê peyam parve kirin. Tulay Hatîmogûllari di peyama xwe de got ku ew îsal jî 10’ê Kanûnê bi binpêkirinên sîstematîk ên mafên mirovan pêşwazî dikin. Tulay Hatîmogûllari, diyar kir ku li her çar aliyên cîhanê gefeke mezin li ser mafên mirovan ên bingehîn hene. Tulay Hatîmogûllari, bi lêv kir ku desthilatdariya siyasî bi rêya qeyûm, zext, tundî û hwd, rûmeta mirovahiyê binpê dike û roj bi roj mafan bisînor dike. Tulay Hatîmogûllari, got ku dê têkoşîna wan a ji bo mafên mirovan bidome. Tuncer Bakirhan, jî di peyama xwe de destnîşan kir ku ew 10’ê Kanûnê bi binpêkirina mafê jiyanê û baweriyan pêşwazî dikin. Bakirhan, anî ziman ku mafên mirovan tên binpêkirin û dê têkoşîna wan a ji bo mafên mirovan bidome.
