Komeleya Rojnamevanan a Dîcle Firatê (DFG) û Komeleya Rojnamevanên Jin a Mezopotamyayê (MKG) xwestin li Wanê têkildarî rojnamevan Nazim Daştan û Cîhan Bîlgîn ên li Bakur û Rojhilatê Sûriyeyê bi SÎHA’yên dewleta Tirk hatin qetilkirin, li kolana Hunerê daxuyaniyê bidin. Polîsan êrîşî çalakiyê kirin û 10 jê rojnamevan 55 kes binçav kirin. Dîsa di saetên êvarê de daxuyanî hate dayîn, qetilkirina rojnamevanan û êrîşa polîsan hate şermezarkirin.
Hevserokê Partiya Wekhevî û Demokrasiyê ya Gelan (DEM Partî) ya Wanê Veysî Dîlekçî, Hevseroka Partiya Herêmên Demokratîk (DBP) Gonul Ûzûnay, hevşaredarên Bajarê Mezin ê Wanê Neslihan Şedal û Abdullah Zeydan, parlamenterê Amedê Mehmet Kamaç û gelek rêxistinên sivîl tevlî çalakiyê bûn.
‘EM PAŞDE GAV NAVÊJIN’
Girseya ku tevî dorpêça polîsan hatin ba hev, bê navber dirûşmên “Çapemeniya azad nayê bêdengkirin”, “Bijî berxwedana Kobanê”, “Em ê bi berxwedanê bi ser bikevin” berz kirin.
Veysî Dîlekçî ewilî axivî û got, “Walîtî her daxuyaniyên me bi îsrar asteng dike. Rayedarên dewletê mecbûr in ku li gorî Destûra Bingehîn tevbigerin, lê mixabin waliyê vî bajarî li gorî qanûnan tevnagere. Bêyî muzakereyê bike rasterast mudaxeleyî daxuyaniya hevalên me dike. Em ji vir bang dikin; bi zext û tundiyê hûn nikarin bi me paşde gav bidin avêtin. Hevalên me yên bi awayekî derhiqûqî hatine binçavkirin divê demildest serbest bên berdan.”
Mehmet Kamaç jî wiha got: “Gelê Kurd bi salane serî li ber we natewîne, ji niha û pê de jî serî li ber we natewîne. Çima qanûn li vê kolanê cuda ye û li kolaneke din cuda ye? Şermezarkirina qetilkirina du rojnamevanên ku di destên wan de ji bilî kamera û pênûsê tiştek di tineye çima qedexe ye? Hûn ji Golanî re dibêjin terorîst, lê serokê we yê MÎT’ê bi wî re li kuçe û kolanên Şamê digere. An hûn ê qanûna xwe biguherînin, an hûn ê mil bi mil bi terorîstan re nemeşin. Em her tim vê dibêjin; Di destekî de gul û di destê din de xencer nabe. Duh we li meclîsê digot divê em yekîtiya civakî pêk bînin, aştiya navxweyî pêk bînin. Li aliyekê siyasetmedar vê dibêjin, li aliyê din jî walî û midûrên polîsan…Em binçavkirina hevalên xwe qebûl nakin.”
BERXWEDANA ROJAVA HAT SILAVKIRIN
Gonul Ûzûnay bal kişand ser şer û êrîşên dagirkeriyê yên li Sûriyeyê û wiha domand: “Têkoşîna gelê Kurd a li dijî çeteyan rastiyên girîng ên li Sûriye û Rojava derxist holê. Di şexsê xebatkarên çapemeniyê Nazîm Daştan û Cîhan Bîlgîn de hat dîtin ku Kurd li Rojava tên qetilkirin û bi şerê herî hovane re rû bi rû ne. Gelên li Tirkiyeyê bi siyaseta demokratîk dixwazin bibin dengê gelên Sûriyeyê û gelên Rojava. Lê belê mîna îro li Wanê ev xwedîderketin rastî zext û zorê tên. Bi taybetî li Wanê her bertekeke demokratîk a ku tê xwestin bê nîşandan rastî êrîşan tê. Em weke partiyên siyasî û demokratîk van êrîş û qedexeyan şermezar dikin. Em ji vir bang dikin; divê hûn hem hiqûqa xwe û hem jî hiqûqa navneteweyî nas bikin. Dest ji van êrîşan berdin. Yekane çavkaniya van hemû pirsgirêkan pirsgirêka Kurd e û pêwîste demildest çareser bibe. Em dîsa dibêjin; Bbi van êrîşan hûn nikarin pêşiya rastiyê bigirin. Pênûs û kamerayên xebatkarên çapemeniya azad wê li erdê nemînin. We îro danê nîvro zêdetirî 50 hevalên me binçav kir, lê binêrin em dîsa hatin vir û em xwedî li wan derdikevin.”
Piştî axaftinan daxuyaniya çapemeniyê bi çepik, tilîlî û dirûşman bi dawî bû. 10 rojnameger jî di nav de 55 kesên ku di saetên sibehê de hatibûn binçavkirin, piştî îfadeyê serbest hatin berdan.
