Şandeya ji bo wergirtina cenazeyên rojnamevan Nazim Daştan û Cîhan Bîlgîn çûn deriyê sînor ê Xabûrê, ji 6’ê Çileyê ve li ser sînor tê rawestandin.
Rojnamevan Nazim Daştan û Cîhan Bîlgîn di 19’ê Kanûnê de li Bakur û Rojhilatê Sûriyê ji hêla dewleta Tirk ve bi SÎHA’yan hatin qetilkirin. Ji bo wergirtina cenazeyên rojnamevanan, şandeyeke ji endamên malbatan û Parlamenterê DEM Partiyê yê Mêrdînê Kamûran Tanhan, nûnerên DFG, OHD’ê û rêxistinên civaka sivîl pêk dihat xwest derbasî Herêma Başûrê Kurdistanê bibe. Şande di 6’ê Çileyê de hate deriyê sînor ê Xabûrê yê li Silopiyaya Şirnexê.
Şande zêdetirî rojeke bi hinceta pergal tune ye li ser sînor tê sekinandin. Di demeke bertekên li dijî sekinandina şandeyê didomin de midûrê polîsan ê navçeyê got: “pirsgirêkek bi me ve eleqeder nîne, em li benda agahiya Enqereyê ne.”
Balkêş e ku li ber deriyê sînor polîsên girêdayî midûriyeta Silopiyayê hatine bicihkirin.
