Balafirên şer ên artêşa Tirk şeva 17’ê Adarê malbateke ku di navbera gundên Berxbotan û Qomîçî yên Kobanê de dijîn hedef girtin. Di encamê de dayik, bav û zarok jî di nav de 9 kes jiyana xwe ji dest dan û 2 zarok jî birîndar bûn.
Komkujî ji aliyê rêxistinên civaka sivîl, rêxistinên mafên mirovan û nûnerên rêveberiya xweser ve bi tundî hat şermezarkirin.
Li Reqa, Tebqa, Amûdê û Eyn Îsayê çalakî hatin lidarxistin. Dio çalakiyan de bêdengiya civaka navneteweyî hat rexnekirin û anîn ziman ku divê hesab ji Tirkiyeyê were pirsîn.
Desteya Perwerde û Fêrkirinê û Meclisa Malbatên Şehîdan ên Reqayê êrîş weke sûcê şer bi nav kirin û banga destwerdana navneteweyî kirin.
Buroya Parastina Zarokan û Meclîsa Jinê ya Zenûbiye yên Tebqayê di çalakiyê de gotin ku divê lêpirsîneke navneteweyî bê destpêkirin û Tirkiye berpirsyarê vê komkujiyê ye.
Meclisa Malbatên Şehîdan a Amûdê jî bang li rêxistinên mafên mirovan kir ku li dijî komkujiyê têkevin nava liv û tevgerê.
Koçberên li kampa Girê Spî ya Eyn Îsa dimînin meşek li dar xistin û li dijî dagirkeriya dewleta Tirk peyama berxwedanê dan.
Di çalakiyan de hat destnîşankirin ku Tirkiye bi van êrîşan polîtîkayên xwe yên qirkirinê didomîne û hat gotin ku agirbest û hevdîtinên aştiyê xapandine.
