Meşa ku bi dirûşma ‘Em bi civaka demokratîk ber bi azadiyê ve dimeşin’ li navçeya Pirsûs a Rihayê dewam dike.
Çalakgerên ku bi wesîleya rojbûna 76’an a Rêber Apo dimeşin, Mûstafa Dag li ser gora wî bi bîr anîn ku di 4’ê Nîsana 2009’an de di ‘Meşa rêwîtiya ber bi rojê ve’ li gel Mahsûm Karaoglan hate qetilkirin.
Ciwanan li gundê Qerûkê qurnefîl danîn ser gora Dag û ew bi bîr anîn.
Endama Koordînasyona Jin ên Ciwan ên DEM Partiyê Elîf Çoban li bîranînê axivî û diyar kir ku ew têkoşîna Mûstafa Dag dewam dikin.
Bavê Mûstafa Dag Salîh Dag jî got, “Roja ku kurê min hate qetilkirin em li înşaetê dixebitîn. Mûstafa dema ku meşvanên Amarayê yên ji Amedê û Rihayê hatin dît, yekser tevlî wan bû. Dema ku me xwest wî asteng bikin got, ‘Ez ji şehîdên din ên Kurdistanê ne hêjatir im’.” Bîranîn bi dirûşma ‘Şehîd namirin’ bi dawî bû.
Ciwan piştre li Rêxistina Navçeya Pirsûsê ya DEM Partiyê li hev kom bûn û name ji Rêber Apo re şandin.
Çalakiya ciwanan wê bi meşa ber bi Navenda Çandê ya Amara dewam bike. Ciwan wê piştre ber bi Amarayê ve bi rê bikevin.
