‘Banga Aştî û Civaka Demokratîk’ a Rêber Apo her di rojevê de ye ku 27’ê Sibatê bi rêya Heyeta Îmraliyê hate eşkerekirin. Lê belê li gel ku mehek di ser re derbas bûye, dewletê hîn jî gavek neavêtiye.
Şêniyên Amedê li ser mijarê ji ANF’ê re axivîn.
Mecît Ûrgay: Rêberê Gelê Kurd her tim zelal bûye. Ji bo aştiyê her tim samîmî nêzîk bûye. Her carê gotiye, ew ji bo aştî û çareseriyê amade ye. Lê belê dewlet ti carî samîmî nebûye. Gelê Kurd bê şert û merc li gotina Birêz Ocalan guhdarî dike. Ji ber vê yekê Birêz Ocalan her tim ji dil alîgirê çareseriyê bûye. Mixabin dewlet her tim li pey armancên rojane ketiye.
Rêberê Gelê Kurd Birêz Abdullah Ocalan berpirsyariya xwe bi cih anî. Bang kir, hêvî û moral da gel. Birêz Ocalan ji bo aştî û çareseriyê amade ye. Lê belê dewletê hîn gaveke bi tenê jî neavêtiye. Beriya her tiştî divê mafê hêviyê bixe meriyetê û azadiya fîzîkî ya Birêz Ocalan pêk bîne. Kurd tenê bi vî rengî dikarin ji dewletê bawer bikin. Eger Tirkiye dixwaze bibe hêzeke super divê bi Kurdan re li hev bike. Birêz Ocalan ji bo gelên Rojhilata Navîn pêvajoyeke nû ya aştiyê afirandiye.
‘DIVÊ DEWLET JI DIL BE’
Veysel Atli: Bi salan e em di nava kaos û bûyeran de ne. Pêvajoya çareseriyê hem ji bo gelê herêmê hem jî ji bo me pêvajoyeke erênî ye. Em êdî şer naxwazin. Ji aliyekî ve qala pêvajoya çareseriyê tê kirin, li aliyê din jî balafirên şer radibin. Em vê yekê qebûl nakin. Divê dewlet ji dil be. Lîderekî Kurdan heye, ew jî Birêz Ocalan e. Birêz Ocalan gav avêt, divê dewlet jî gavê biavêje. Em êdî şer naxwazin.
‘EM DIXWAZIN KU GAVÊN ŞÊNBER BÊNE AVÊTIN’
Mehmet Salîh Kizil: Ne gotin, em êdî pêvajoyeke ji gavên şênber dixwazin. Ji aliyekî ve qala aştiyê tê kirin, lê li aliyê din jî balafirên şer nasekinin. Em ê çawa qala aştiyê bikin? Dewlet ji bo aştiyê gavekê neavêje. Divê dewlet tavilê gavê biavêje. Rêber Apo berpirsyariya xwe bi cih anî. Divê êdî dewlet jî berpirsyariya xwe bi cih bîne.
‘EM ÊDÎ JI DEWLETÊ BAWER NAKIN’
Haci Tanriverdî: Zehmet e ku ev pirsgirêk bi du yan jî sê gotinan bê vegotin. Kîn û nefreta ku çil sal in dewam dike, bandor li me hemûyan kiriye. Em êdî şer naxwazin. Bi mirinê tiştek bi dest nakeve. Şer tenê me bi paş dixîne. Em piştgiriyê didin vê pêvajoyê, lê belê pirsa herî mezin ev e: Em ê çawa ji dewletê bawer bikin? Em êdî nikarin ji dewletê bawer bikin.
