Li Amedê 1’ê Gulanê Cejna Karkeran wê li Qada Stasyonê bi dirûşma ‘Bi kedkaran ber bi civaka demokratîk ve’ bi mîtîngeke herêmî bê pîrozkirin. Platforma Ked û Demokrasiyê ya Amedê wê pêşengiyê ji mîtîngê re bike û ji bajarên derdorê jî wê mirov tevlî bibin.
Endamê Komîteya Amadekar Denîz Yûrtsever li ser amadekariyên mîtîngê ji ANF’ê re axivî û got, “Bêguman ji bo hemû rêxistinên kedê 1’ê Gulanê rojeva bingehîn e. Rewşeke ne aram heye ku bi salan e dewam dike. Vê yekê 5 salên dawî weke krîza aboriyê xwe nîşan da. 5 mehên dawî jî li Tirkiyeyê atmosfer guherî. Pêvajoyeke aştiyê destpê kir. Me pêvajoya aştiyê xist rojeva xwe û bi vî rengî em tevgeriyan. Lewma dirûşma me ya îsal bi vî rengî ye: ‘Azadiya kedê û avakirina civaka demokratîk’.
KRÎZA ABORIYÊ YA JI BER ŞER ZÊDE DIBE
Yûrtsever anî ziman ku krîza aboriyê ya li Tirkiyeyê ji ber şer giran dibe û got, “Li vî welatî 40 sal in şer diqewime. Beşeke girîng a aboriyê ji şer re hate veqetandin. Desthilatdariyê bi xwe qebûl kir ku şer çareserî nîne. Lewma eger tê xwestin ku karker û kedkar bi rastî jî parekê ji aboriyê werbigirin divê ev şer bi dawî bibe. Para ji şer re hatiye veqetandin divê ji qada civakî, qada cemaweriyê re bê dayin. Em ê bi van daxwazan li qadan bin. Divê pêvajoya aştiyê bê xurtkirin. Pêşvebirina aştiyê wê daxwazên me kedkaran jî pêk bîne.”
EM LI BENDÊ NE KU HEMÛ KARKER Û KEDKAR DAKEVIN QADAN
Yûrtsever diyar kir ku wê 1’ê Gulanê Cejna Karker û Kedkaran li Qada Stasyonê ya Amedê pîroz bikin û got, “Em zanin û dibînin ku îro asta xizaniyê di ser 80 hezar TL’yî, asta birçîbûnê jî di ser 30 hezar TL’yî re ye. Em vê rewşê li qadê jî dibînin. Daxwaza bingehîn a karker û kedkaran ew e ku karibin mûçeyekî pê bijîn werbigirin. Em dixwazin dawî li kedxwariyê bê anîn û krîza aboriyê êdî bê kêmkirin. Karker û kedkar bêguman wê bi van daxwazên xwe li qadan bin. Ji bo pêkhatina van jî divê têgihiştineke demokratîk li welêt ava bibe. Me amadekariyên xwe yên ji bo 1’ê Gulanê zêde kir. Em li benda karker û kedkaran e ku bên qadê.”
