Ji bo gerîlayê HPG’ê Mahîr Destîna (Rîşwan Salih) ê ku di êrîşa dewleta Tirk a 22’ê Adara 2020’an li ser Xakûrkê de bi giranî birîndar bû û di 31’ê Adara 2020’an de şehîd bû, li qezaya Çarqurneyê konê sersaxiyê hate danîn. Gel û welatparêz çûn cihê sersaxiyê û ji malbata Şehîd Mahîr Destîna re sersaxî xwestin.
Sersaxiya ku li qezaya Çarqurne ya bi ser Rêveberiya Xweser a Raperîn a Silêmaniyê hatibû danîn, bi beşdariyeke zêde pêk hat. Gelê welatparêz destnîşan kir ku têkoşîna Şehîd Mahîr Destîna di meşa azadiyê ya gelê Kurd de xwedî cihekî girîng e.
Hate ragihandin ku gerîlayê HPG’ê Mahîr Destîna di berxwedana Xakurkê de tevlî karwanê şehîdên Tevgera Azadiyê ya Kurd bûye. Di roja duyemîn a sersaxiyê de, wê merasîmek bîranînê ji bo bîranîna şehîd were lidarxistin.
Sibe demjimêr di 14.00’an de, li Mizgefta Selaheddîn a li qezaya Çarqurneyê wê ziyaretên sersaxiyê ji bo Şehîd Mahîr Destîna bên qebûlkirin.
