Hesreta welêt veguhere agirekî ku her roj bedena mirov dişewitîne. Lê belê hêviya vegera li welêt weke hêviyeke ku her roj ji binê axê şîn dibe dil û ruhê mirovan xwedî dike. Ji ber vê yekê li welatên cuda derfet ji mirovan bê pêşkêşkirin jî bi qasî jiyana li welêt bi wate û bedew nîne.
Tavîn Têkoşîn jî pişta xwe daspêre wê jiyanê û di temenekî ciwan de li ber sîstema kapîtalîst radibe ku jinê weke metayê bi kar tîne û tevlî nava Tevgera Azadiyê dibe.
Tavîn Têkoşîn (Sîbel Çelîk) li nava malbateke welatparêz ji dayik bû. Tavîn ku ji Çewlîgê ye, li Elmanyayê ji dayik dibe û mezin dibe. Malbata wê her çend di nava çanda kapîtalîst û sîstema asîmîlasyonê de bû, çanda Kurdîtiyê û welatparêziya xwe parast. Vê yekê bandoreke xurt li Tavîn kir.
Hîn di ciwanttiya xwe de fikrên Rêber Apo nas kir û dest bi lêgerîna li jiyaneke azad kir. Li ser vê bingehê bi rengekî çalak beşdarî nava karên ciwanan bû. Nêzî salekê di nava karên rêxistiniya ciwanan û gel de cih girt.
Hesreta wê ya welêt her roj hîn mezin bû. Lewma bi armanca vegera li welêt têkoşiya. Her ku rastiya welêt û êrîşên dijmin ên li ser tevgera azadiyê dît, hêrsa wê mezin bû. Weke jineke ciwan ji bo karibe barê şoreşê hilgire, biryar da ku tevlî nava têkoşînê bibe û berê xwe da çiyê.
Weke jineke ciwan û gerîlayeke YJA Starê tevlîbûna li nava tevgera azadiyê bibe ji bo Tavîn bû rûmet û kêfxweşiyeke mezin. Bi taybetî ji bo bersivê bide bedenên ku di oxira azadiyê de canê xwe feda kirine, ti astengî nas nekir û beşdarî nava vê têkoşînê bû.
Piştî ku gihîşt çiyê tevlî nava perwerdeya bingehîn bû. Di çarçoveya perspektîf û perwerdeya Rêber Apo de zû hînî jiyana gerîla bû. Di nava tevgera azadiyê de têkiliyên hevrêtiyê û jiyana komunal kir ku ji qalibên şexsî rizgar bibe ku sîstemê lê ferz dikir. Lewma di nava şert û mercên herî giran de hewldanên xwe zêde kir û têkoşîna xwe dewam kir. Bi vê ked û hewldanê bû şervaneke zane û bi biryar.
WEZÎFE Û BERPIRSYARIYÊN XWE BI SERKETÎ BI CIH ANÎ
Bi tecrûbeyên ji jiyana gerîla wergirtî û bi agahî û biryardariya ji rêbaza jiyana komunal bi dest xistî, derbasî qada leşkerî bû. Ji bo bide pey armancên xwe di perwerdeyê de serketineke mezin bi dest xist. Bi vê îrade û biryardariyê bandor li hevrêyên xwe jî kir.
Gerîla Tavîn Têkoşîn piştî ku perwerdeya xwe ya leşkerî bi serketî qedand, ji bo karibe li dijî êrîşên DAÎŞ’ê li refên herî pêş têbikoşe berê xwe da xeta Kerkûk û Mexmûrê. Li vê derê weke şervaneke azadiyê ya YJA Starê ya pêşeng, ji bo gel ji hovîtiya DAÎŞ’ê biparêze fedakariyeke mezin kir.
Tevlî gelek çalakiyên serketî bû û encam bi dest xist. Bi baweriya xwe ya ji serketinê hevrêyên xwe motîve kir û berê wan da şer. Ne hêza dijmin ne jî êrîşên DAÎŞ’ê berxwedana van şervanan şikand. Dijmin ti carî nekarî bigihêje armanca xwe.
Tavîn Têkoşîn piştî ku wezîfeya xwe bi serketî bi cih anî careke din berê xwe da çiyayên azad û derbasî herêma Heftanînê bû. Bi tecrûbeya ji şerê li dijî DAÎŞ’ê wergirtî bi roleke çalak rabû û pêşengî jihevrêyên xwe re kir. Li vê derê jî bi îrade û biryardariyeke cuda li hemberî dagirkeriya dewleta Tirk têkoşiya û beşdarî gelek çalakiyan bû.
Êdî weke pêşengeke ciwan û şervaneke Apoyî di nava şert û mercên herî giran de bi berpirsyariya têkoşînê rabû û bi cidiyet nêzî wezîfeyên xwe bû. Piştre derbasî nava Komîteya Navendî ya PKK’ê bû û li vê derê jî kar kir. Karên rêxistinî, îdeolojîk û leşkerî yên li vê derê gelekî bandor lê kir.
Bi baweriya ji xwe û têkoşînê rola xwe ya pêşengiyê di pratîkê de hîn bi xurtî nîşan da. Bi vê sekna xwe û karên xwe ji hevalên xwe re bû çavkaniyeke mezin a hêz û moralê. Ji ber vê yekê jî wezîfe û berpirsyariyên xwe yên şoreşgerî hemû bi serketî bi cih anî.
Êdî kesî nema dikarîbû xwe li tecrîda giran û êrîşên faşîst ên dewleta Tirk rabigire. Her gerîlayên azadiyê û şervanên Rêber Apo ji bo şikandina tecrîdê û van êrîşan pêşniyar kirin ku derbasî eniyên şer bibin.
Tavîn Têkoşîn jî ji bo bibe parçeyek ji vî şerî derbasî qada Egîdan û Mizgînan bû. Li xaka Botanê bexwedan, têkoşîna rûmetê û şerê ku mîrateya bi sedan şehîdan e, meşand.
Weke hevrêyên din wê jî dixwest vegere Bakur. Ji bo vê armanca xwe pêk bîne, kete nava hewldan û fedakariyeke mezin û ber bi qada Botanê ve meşiya. Di her gavê de ji bo pêkanîna armancên hevrêyên xwe meşiya. Bi dilsoziya xwe ya bi xeta azadiyê ya jinê re weke milîtaneke Apoyî ruhê demê ji xwe re kir armanc û ji dil tevlî her karî bû.
ÎRO BI SEDAN TAVÎN LI SER ŞOPA HEQÎQETÊ NE
Bi rêbazeke bi tecrûbe li hemberî dijmin çalakî lidar xist. Heta kêliya dawî ya şehadeta xwe bi biryardarî û wêrekiyeke mezin şer kir.
Di 21, 22 û 23’ê Çileya 2023’an de dewleta Tirk a dagirker li hemberî çeperên gerîla êrîşên berfireh kir. Bi pêşengiya gerîla Tavîn Têkoşîn û Leyla Sorxwîn sê rojan têkoşîneke mezin hate meşandin. Herdu şervanên azadiyê li hemberî teknîk û êrîşa dijmin berxwedaneke dîrokî nîşan dan. Di encama vî şerî de herdu gerîlayan heta nefesa xwe ya dawî şer kirin û şehîd bûn.
Şehîd Tavîn weke şervaneke azadiyê û ciwaneke pêşeng ji doz û têkoşîna xwe bawer kir; da ser şopa bi hezaran şehîdan. Ji roja ku tevlî bû heta bi şehadetê dilsozê armancên xwe bû. Bû sembola bexwedana gerîla ya li Kurdistanê û sekna jinên Kurd.
Îro li ser şopa vê heqîqetê bi hezaran jin û ciwan vê rastiyê hembêz dikin û tevlî nava refên tevgera azadiyê dibin. Em dibînin ku Tavînek diçe, li pey wê bi sedan Tavîn didin ser şopa vê heqîqetê, weke agirê azadiyê bi biryardariya ronîkirina her derê dimeşe.
