Hikûmeta Îsraîlê piştî êrîşên li ser sivîlên Durzî yên li bajarê Siwêdayê yê başûrê Sûriyeyê bi eşkereyî rejîma Şamê hedef digire. Îsraîlê soza “destwerdana dijwar” li dijî hêzên rejîmê da û di heman demê de lez daye amadekariyên leşkerî.
KATZ: HIŞYARÎ BI DAWÎ BÛ, NIHA WÊ DERBEYÊN GIRAN BÊN
Wezîrê Parastinê yê Îsraîlê Îsraîl Katz li dijî rêveberiya Şamê daxuyaniyek tund da û got: “Hişyariyên ji bo Şamê bi dawî bûn. Niha wê derbên giran bên.”
Katz ev hişyarî kir: “Heta ku êrîşên li Swêdayê bi tevahî werin tunekirin û paşde vekişin wê operasyonên Tsahalê bidomin.”
Katz wiha berdewam kir: “Ji bo xwişk û birayên me yên Durzî yên li Îsraîlê: Ji bo parastina xizmên we yên li Sûriyeyê, ji Tsahal (artêşa Îsraîlê) bawer bin. Serokwezîr Netanyahu û ez, wekî Wezîrê Parastinê me teahûd daye û em ê teahûda xwe bi cîh bînin.”
NETANYAHU: REWŞ CÎDÎ YE, EM KETIN NAVA LIV Û TEVGERÊ
Serokwezîr Binyamin Netanyahu piştî geşedanan bang li welatiyên Durzî yên li Îsraîlê kir û got, “Rewşa li Swêdayê pir cîdî ye. Tsahal, hêza hewayî û yekîneyên din ji bo rizgarkirina xwişk û birayên me yên Durzî û tinekirina milîsên rejîmê ketin nava liv û tevgerê.”
ARTÊŞA ÎSRAÎLÊ AMADEKARIYA DESTWERDANÊ DIKE
Li gorî nûçeyên medyaya Îsraîlê yên ku xwe dispêre çavkaniyên leşkerî, artêşa Îsraîlê amadekariya ji bo pevçûnên ku wê çend rojan li Sûriyeyê bidome, dike. Li nêzîkî Girên Golanê gelek leşkerî bi cih kirine û ji yekîneyên paraşûtê re jî ferma amadekariya ji bo Sûriyeyê bikin, hatiye dayin.
Serfermandarê Giştî, destûra êrîşên hewayî yên ku wezaretên rejîmê yên Şamê jî di nav de ne, hedefên diyarkirî daye.
BIRYARGEHA LEŞKERÎ YA ŞAMÊ HEDEF HATE GIRTIN
Artêşa Îsraîlê daxuyad ku îro di nava rojê de li Şamê baregeheke leşkerî ya rejîma Sûriyeyê xistiye û got, “Em êrîşên li başûrê Sûriyeyê yên li dijî sivîlên Durzî ji nêz ve dişopînin. Em li gorî talîmatên otorîterên polîtîk tevdigerin û ji hemû senaryoyan re amade ne.”
HÊZÊN LI SER SÎNOR TÊN ZÊDEKIRIN
Artêşa Îsraîlê biryar da ku hêzên xwe yên li ser sînorê Sûriyeyê zêde bike. Di daxuyaniyê de wiha hate gotin: “Di çarçoveya nirxandina rewşê de bicihbûna hêzan û pêkanîna peywira xwe di ber çavan de tên derbaskirin. Ji bo misogerkirina ewlehiyê wê operasyonên hem parastinê û hem jî yên êrîşê bidomin.”
YE’YÊ BANG KIR
Yekîtiya Ewropayê (YE) ji ber pevçûnên li Sûriyeyê “fikarên xwe” anî ziman û got, “Divê hemû alî bê cudakarî sivîlan biparêzin.” YE têkildarî êrîşên hewayî yên Îsraîlê li ser axa Sûriyeyê jî got ku divê ji serweriya Sûriyeyê re rêzdar bin.
