Gerîlayên HPG’ê Arîn Ararat û Cîger Qîranî yên ku di demên cuda de li Herêmên Parastinê yên Medyayê şehîd bûn, bi merasîmekê hatin bîranîn. Di merasîmê de endamên Saziyên Rêveberiya Xweser a Şengalê û gel amade bûn. Şehîd Arîn Ararat di Kanûna 2021’an de li Herêmên Parastinê yên Medyayê şehîd bûbû. Merasîma bîranînê bi deqeyek rêzgirtinê destpê kir.
Di merasîmê de, Viyan Hebabî li ser navê Fermandariya YBŞ-YJŞ axivî. Wê di şexsê şehîd Arîn Ararat û Cîger Qîranî de, tevahiya şehîdên xeta azadiyê û şehîdên 74 fermanan bi bîr anî û sersaxî ji her du malbatan û civaka Şengalê re xwest.
Hebabî li ser tekoşîna herdu cangoriyan got: “Her kes dizane ku sedema rakirina çekan ji aliyê van hevalan ve çi bû û çawa bû. Herdu hevalan li ber zilmê tu carî serî netewandin û xwe ji bo civaka xwe heya kêliya dawî kirin feda. Em ê bibin minetdarên van hevalan.”
Fermandar Viyan Hebabî axaftina xwe wiha bi dawî kir: “Ger sekinîn û mayîna me li ser axa me hebe, ew jî bi saya van şehîdan e. Em weke rêhevalên wan, weke şopdarên rêya wan, weke civaka Êzidî bi şehadeta wan serbilind in û rêya wan a tekoşînê heya dawî didomînin. Em dubare sersaxiyê ji tevahiya civaka Êzidî, malbat û hezkiriyên wan re dixwazin. Bila serê Rêber Apo sax be û şehîd namirin.”
Li ser navê Saziya Malbatên Şehîdan, dayîka Şehîd Tîrêj, Berfê Eliyas axivî. Berfê di destpêka axaftina xwe de sersaxî ji tevahiya civaka Êzidî û malbatên cangoriyan re xwest û got: “Ger hevalan di wan şert û mercan de berê xwe dan çiyayên azad, sedem ew bû ku dixwestin tol û heyfa 74 fermanan hilînin. Ev herdu heval bûn ku ji taliya fermanan filitî bûn. Wan navê xwe li dîrokê nivîsand. Xeta wan a hilbijartî, xeta şehîdan bû ku di fermana sala 2014’an de bi dayîk û xwîşkên wan ve hatibûn.”
Eliyas anî ziman: “Em ne poşman in ku zarokên me yên weke Tîrêj, Arîn û Cîgeran li çiyayên azad şehîd bûne û li dû heyfa qîrîna dayîk û xwîşkên xwe ketibûn û heya kêliya jiyana xwe li ber xwe dan û şehîd ketin. Em dubare sersaxiyê ji tevahiya gelê xwe û dost û hevalên wan re dixwazin û dibêjin ‘Şehîd namirin, Bijî Serok Apo, Bijî berxwedana Gerîla’.”
Li ser navê Malbata Şehîd Arîn, bavê wê Qehtan Elî jî axivî û xêrhatina her kesê amadebûyî kir. Wî dest bi axaftina xwe kir û got: “Di nava van salên derbasbûyî de me gelek bedelên giranbiha yên mîna Mam Zekî, Zerdeşt, Dijwar û Egîdan dan. Helbet bi şehadeta wan hevalan em pê serbilind in.”
Qehtan Elî behsa kesayetiya keça xwe kir: “Arîn di sala 2015’an de beşdarî nava refên leşkerî bû. Bi dehên yên mîna Arîn berê xwe dan xeta herî pêş û li hemberî êrîşên li ser civaka xwe şer kirin û li ber xwe dan û şehîd ketin. Em bi şehadeta wan serbilind in.”
Elî diyar kir: “Raste şehadet bi êş e, lê êşeke xweş e. Êşa şehadetê ji hemû êşan xweştir e, ji ber ku bi saya wê şehadetê bi hezaran gel hatin rizgarkirin û ji wê mirina bi êş hatin rizgarkirin. Ji ber wê em dibêjin êşa şehadetê xweş û bi wate ye.”
Elî herwiha anî ziman: “Hêzeke ku li ser fikir û felsefeya Rêber Apo ava bibe, bila her kes wê hêzê nas bike. Em bi şehîdekî û diduyan xilas nabin, keç û xortên Êzidiyan pir in. YBŞ û YJŞ pir in û xwe li ser fikra Rêber Apo roj bi roj bihêztir dike. Ev hêz heya niha civaka me ji her cure xeterî diparêze û wê biparêze jî, ji ber em hêza xwe ji civak û gelê xwe digirin. Van canê xwe li ber welatê xwe dane, van rûmeta gelê xwe parastiye, ev in Şehîd.”
Bavê Şehîd Arîn di dawiyê de got: “Em ji her dera Kurdistanê û her parçeyê Kurdistanê re amade ne ku canê xwe bidin, ji ber ku ev exlaqê Rêbertiya me ye û em xwe li ser perwerde dikin û dubare silavên xwe ji tevahiya Malbatên Şehîdan re rêdikin û ji wan re dibêjin serê we sax be û serê Rêber Apo sax be.”
Fermandariya Biryargeha Navendî ya Hêzên Parastina Gel HPG’ê jî bi nameyekê sersaxî ji malbata Arîn Ararat û civaka Êzidî re xwest.
Merasîm bi pêşandana sînevîzyonekî û dirûşmeyên “Şehîd Namirin” bi dawî bû.
