Îro li Şengalê, li stargeha pîroz a Êzidiyan ku ji vir û 11 sal berê rastî ferman û komkujiya herî hovane ya sedsalê hat, konferanseke girîng tê lidarxistin.
Konferansa Ronakbîrî ya Şengalê ku bi dirûşmeya ‘’Banga Civaka demokratîk bersiva 73 fermana ye’’ tê lidarxistin, îro bi coş û hêviyeke mezin destpê kir. Weke ji nav û dirûşmeya konferansê jî xuya dibe, civaka Êzidî û gelê Şengalê bi vê konferansê re ne tenê bersiva fermana 3.8.2014’an lê her wiha bersiva dîroka fermanan didin. Her wiha Şengal bi vê konferansê re bersiva peyama Rêber Abdullah Ocalan a ‘’Banga Civaka Demokratîk ji bo Êzidiyan destpêka ronesansê ye’’ jî dide. Konferans ji aliyê Akademiya Zanistên Civakî ya Abdullah Ocalan ve tê lidarxistin.
Konferansê saet di 09:00’an de, bi beşdariya bi sedan mêvanên ji Şengalê û derveyî Şengalê destpêkir. Hemû sazî û dezgehên girêdayî Rêveberiya Xweser, Tevgera Azadiya Jinên Êzidî (TAJÊ), Yekîneyên Berxwedana Şengalê (YBŞ), Yekineyên Jinên Şengalê (YJŞ), Asayîşa Êzîdxanê, Yekîtiya Ciwanên Êzîdxanê, Jinên Ciwan ên Şengalê, oldar û ilimdarên Êzidî, partiyên siyasî û saziyên civakî yên Şengalê, nûnerên gelê Ereb ên Şengalê jî di nav de ji hemû beşên civaka Êzidî û gelê Şengalê delege tevlî konferansê bûne.
JI BEXDA, SILÊMANIYE, MEXMÛRÊ BI DEHAN MÊVAN BEŞDAR BÛN
Her wiha ji Bexdayê komeke ji 15 kesan ku di nav de çalakvanên siyasî, çalakvanên medenî, akademisyen û rojnamevan hene beşdarî konferansê bûne. Ji Silêmaniyê jî komeke 15 kesan ku di nav de zanayên ola Îslamê, nûnerê Zerdeştiyan, oldar û nûnerên gelê Cihû, parêzer, lêkolîner, saziyên civakî, akademisyen û çavderên siyasî di konferansê de amade ne. Li ser navê gelê Wargeha Ş.Rustem Cudî jî heyetek tevlî konferansê bûne. Hejmarek hunermend, nivîskar û akademisyenên ku nekarîn werin Şengalê jî, ewê bi rêya online beşdarî konferansê bibin û gotarên xwe pêşkeş bikin.
‘RONESANS WÊ CIVAKA ÊZIDÎ BER BI SERXWEBÛNÊ VE BIBE’
Konferansê bi rêzgirtina ji bo bîranîna şehîdan destpê kir. Piştre Hevseroka Meclîsa Xweseriya Demokratîk a Şengalê Cîhan Celo, li ser navê Rêveberiya Xweser peyamekê da û got: ‘’Em konferansê li mîmarê azadiyê Rêber Apo pîroz dikin. Ronesansa Êzidiyan, Êzidiyan ji bindestiyê ber bi serxwebûnê ve dibe. Rêber Apo bang li civaka Êzidî dike ku parastina xwe ya cewherî û rêveberiya xwe ya cewherî xurt bike.’’
Li ser Navê Desteya Oldaran jî Mam Şûweyş jî li ser navê oldaran peyamek pêşkeşî konferansê kir û got: ‘’Êzidî pêwîst e bibin destek û biryarek.’’
TAJÊ: EM KONFERANSÊ LI SEROK APO PÎROZ DIKIN
Neam Eliyas jî li ser navê TAJÊ jî Neam Eliyas peyamek pêşkeşî konferansê kir û wiha axivî: ‘’ Ev konferans berhema şehîdan e, salvegera fermanê nêz dibe, em şervanên azadiyê yên bi hawara me ve hatin bibîrtînin û konferansê li wan pîroz dikin.’ Her wiha em li serokê gelên bindest, Serok Apo pîroz dikin.’’
WÊ PEYAMA RÊBER APO BÊ XWENDIN
Rêber Apo ku banga Ronesansa Êzidiyan kiribû, peyameke taybet ji bo konferansê şandiye. Her wiha, Endama Konseya Serokatî ya KCK’ê Sozdar Avesta jî peyameke bi dîmen gihand konferansê.
Piştî xwendin û temaşekirina peyaman, wê sînevîzyonek derbarê banga Aştî û Civaka Demokratîk û têkoşîna xweseriyê ya Şengalê de were temaşekirin.
DI ROJA DESTPÊKÊ DE 5 GOTAR TÊNE PÊŞKÊŞKIRIN
Konferansa ku wê 2 rojan berdewam bike xwedî navorekeke têr û tijî ye, wê bi giştî di 9 mijaran de gotar werin pêşkeşkirin û nîqaş werin meşandin.
Mijarên ku wê di roja yekemîn a konferansê de werin nîqaşkirin ev in;
Di Herikîna Dîrokê de Hebûna Civakî ya Êzidiyan
Di Çarçoveya Çand-Bawerî û Felsefê de Êzidî û Ezdatî
Weke Cewher û Bermahiya Civakê Heqîqeta Jinan Bi Jineolojî Ronîkirin
Di Nav Talan û Qirkirinê de Rastiya Welat-Welatparezî û Ekolojî
Zîhniyeta Fermanê, Rastiya Qirkirina Fîzîkî û Çandî
