Navenda Ragihandin û Çapemeniyê ya YRK’ê derbarê şehîd Simko Kobanê ev tişt diyar kir:
“Beriya niha di daxuyaniya xwe ya derbarê êrîşa bi dron a li ser gundê Şêweguzan a li herêma Pêncewîn de me dabû diyarkirin ku rejîma Îranê ya dagirker hêzên me kiriye hedef û di encamê de hevrêyekî me yê bi navê Simko Kobanê şehîd bû. Niha em bi berfirehî nasnameya hevreyê xwe bi gelê xwe yê welatparêz û bi raya giştî re parve dikin.
Di demên herî zêde êrîş li ser rejîma Îranê ya dagirker pêk dihatin de, wek Yekîneyên Rojhilatê Kurdistanê me heta dawî sebir kir ku nekevin nava rewşeke cuda de. Lê belê em êrîşên bi vî rengî yên ku hêzên me bi awayekî nemerdane dikin hedef, mîna êrîşeke terorîstane dinirxînin.
Di serî de malbata hêja ya hevrêyê me yê şehîd, em sersaxiyê ji tevahiya gelê Kurdistanê re dixwazin û soza xwe dubare dikin ku xeyalên wan bigihînin serkeftinê.
Agahiyên li ser nasnameya hevreyê me yê şehîd bûye, bi vî rengî ne:
Nasnav: Simko Kobanê
Nav û Paşnav: Ûmîd Huseynî
Cihê Jidayikbûnê: Kamyaran
Navê Dayîk – Bav: Şino – Cihangîr
Dem û Cihê Şehadetê: 19’ê Tîrmeha 2025’an – Pêncewîn
Ûmîd Huseynî bi navê xwe yê tevgerê Simko Kobanê ewladê esîl ê gelê me yê Rojhilatê Kurdistanê, yê ku bi nirxê welatparêziyê ya herêma Hewraman mezin bûye û tu dem ji rastiya gelê xwe dûr neketiye, her tim bi wêrekî li beramberî rejîma Îran a dagirker û kevneperest serê xwe hildaye. Ewladekî bi nirx ê gelê me yê Hewraman bû ku bi paqijî zarokên xwe tînin dinê, bi paqijî perwerde dikin û bi paqijî oxir dikin.
Ûmîd Huseynî zarokekî gelê me yê Hewraman e ku bi hestên welatparêziyê zarokên xwe mezin dikin. Di sala 2001’an de çavê xwe di nava malbateke niştîman perwer de vedike. Lêgerîna Ûmîd di temenê ciwantiyê de ji bo heqîqetê destpê dike. Bi avabûna şoreşa Rojava re û bi berxwedaniya bê hempa ya Kobanê, dilê Ûmîd bi dilê Kobanê re dibe yek û Rojava dibe bingehekî ji bo naskirina şoreşa azadiya Kurdistanê. Ev coşa şoreşa Rojava di dilê Ûmîd de dibe hêviyeke mezin û wekî heloyekî berzefir ku wê bi azadî her tim bifire, berê xwe dide çiyayên bi heybet ên Kurdistanê. Ûmîd navê fermandarê mezin Simko Serhildan radike û bi eşqa berxwedana Kobanê, Kobanê ji xwe re weke paşnav hildigre.
Hevrêyê me Simko Kobanê piştî ku biryara beşdarbûnê dide û tevlî nava refên Tevgera Azadiyê dibe. Bi dîtina perwerdeyên bingehîn re pir ji nêz de zext, dagirkerî û siyaseta kevneperest a rejîma dagirker a Îranê ku li ser gelê me yê Rojhilatê Kurdistanê dide meşandin dibîne û dikeve ferqa rastiya xwe ya ku jê dûr hatiye xistin. Ev rastî di kesayeta hevrêyê me Simko Kobanê de ku hîn nû beşdar bûye gelek bandorên bi hêz derdixe holê. Li ser vê rastiyê hem dixwaze her tim Rêber Apo nas bike û hem jî ji vê re bibe bersiv. Li hember hemû cure zilm û zora ku li ser gelê me tê meşandin û li ser vê rastiyê dixwaze kesayeta xwe bide avakirin. Bi van rastiyan re dibe lêgerîvanekî heqîqeta Apoyî ya ku bê rawestan dimeşe û ji xeyalên gelê xwe re dibe bersiv. Di rûyê wî de hêviyeke mezin ji bo pêşeroja welat dibiriqî.
Beriya ku beşdar bibe di herêma xwe de gerîla dibîne û ji jiyana hevalan a dilnizm bandor dibe. Dema ku beşdar dibe bi hevaltiya hevalan bandor dibe û tişta ku despêkê dîtiye ji bîr nake û her tim bi jiyana xwe re dike yek, wan yekan her tim mezin dike û dide mezinkirin. Heval Simko şervanekî parastina nirxên bi zehmetiyan hatibû avakirin bû.
Ji bo ku kesayeta xwe ji kûr de ava bike di sala 2018’an de derbasî dibistana sekvantiyê dibe. Bi perwerdeya ku dibîne re ew jî dibe gerîlayekî pispor ê Kurdistanê û êdî ji bo her tiştî amade ye. Di sala 2019’an de berê xwe dide Rojhilatê Kurdistanê û ji bo zanakirina gelê xwe dibe şervanekî bê rawestan. Her kêliyê xwe yê jiyanê dinirxîne û ji bo nasandina Rêber Apo dikeve nava her hewldanê.
Di nava qadên pratîkê de bi temenê xwe yê ciwan, ji gelek kar û xebatê re pêşengtî dike. Di demek kin de karî bibe fermandarekî ciwan û ji hevrêyên xwe re pêşengiyê bike. Hevrêyê me Simko Kobanê bi dilgermiya xwe ya bê dawî, bi fedekarî, dilnizmî û hevrêtiya rasteqîn nimûneyek bû di nava refên me de. Dibe xwedî kesayetek zana ya ku her tim xwe digihîne û pêwîstiyên şoreşê bi cih tîne. Bi jiyan û tevlîbûna xwe, bi kar û xebatên xwe, bi berhemên xwe û bi dengê xwe yê zelal wê her tim mîna heloyekî li ser lûtkeyên Çiyayên Zagrosan were jiyankirin.
Di dawiyê de wek Yekîneyên Parastina Rojhilatê Kurdistanê, di serî de em ji malbata hevreyê xwe yê hêja re û ji tevahî gelê Rojhilatê Kurdistanê re sersaxiyê dixwazin û careke din em soza tolhildanê ji gelê xwe re didin û xwîna hevalê xwe em ê bi tu şêwazî li erdê nehêlin.”
