Bi wesîleya nêzbûna 11’emîn salvegera fermana 3’ê Tebaxê ya li dijî Êzidiyên li Şengalê, Komîteya Dîplomatîk a Tevgera Azadiya Jinên Êzidî (TAJÊ) nameyek fermî ji 19 welat û saziyên ku hîn jî fermana 3’yê Tebaxê wekî qirkirin nas nakin re şand.
Di nameya komîteyê de ev tişt hatin gotin:
“11 sal in li ser fermana 3.8.2014’an ku çeteyên DAÎŞ’ê li ser civaka Êzidî li Şengalê pêk anî derbas dibe. Civaka Êzidî fermana 74’an li pêş çavên cîhanê jiya. Di vê fermanê de bi hezaran mirovên Êzidî hatin kuştin, dîlgirtin û ji cih û warên xwe koçber bûn. Qûrbaniyên herî zêde yê fermana 74’an jin û zarok bûn. Jinên Êzidî hatin dîlgirtin, firotin, tecawizkirin, êşkencekirin û kuştin. Bi sedan zarok, pîr û kal ji tî û birçîbûnê jiyana xwe ji dest dan. 11 sal in li ser fermana 74’an re derbas bû, lê hîn jî êş û birînên fermanê nehatine dermankirin û trajediya fermanê derbas nebûye. Heya niha 2900 mirovên Êzidî ku piraniya wan jin û zarok in di destê çeteyên DAÎŞ’ê de dîlgirtî ne. Bi sedan jî çarenûsa wan bi tu awayî nayê zanîn. Hîn bi dehan gorên komî hene ku nehatine vekirin û hîn jî gorîn nû têne dîtin.
14 WELAT FERMANÊ WEKE QIRKIRIN QEBÛL KIRINE
Di nava 11 salan de 14 welatan bi fermî fermana 3.8.2014’an û kiryarên çeteyên DAÎŞ’ê li dijî civaka Êzidî wek qirkirin pejirandin.
Me Tevgera Azadiya Jinên Êzidî dosyek berfireh li ser fermana 3.8.2014’an amade kiriye. Em vê dosyaya ku bi belge û agahiyên girîng îspat dike ku fermana 3.8.2014’an a li ser civaka Êzidî li Şengal hat jiyîn qirkirin e, pêşkêşî we dikin. Em ji we daxwaz dikin ku hûn jî bi erk û berpirsyartiyên xwe ya mirovî rabin û fermanê bi fermî weke qirkirinê nas bikin.
JI BO PARASTIN Û PÊŞÎGIRTINA ÊRÎŞAN JIN XWE BIRÊXISTIN DIKIN
Weke jinên Êzidî, ji bo em pêşî li qirkirina jin û civaka xwe bigirin, piştî qirkirina sala 2014’an di sala 2015’an de destpêkê weke komeke jinan bi navê Meclîsa Jinên Êzidî xwe bi rêxistin kir. Weke bersiva jenosîdê li dijî jin û civaka Êzidî me rêxistina xwe ava kir. Ji bo jin bibe xwedî hêz û karibe parastina xwe ji ferman û êrîşan bike,me xebatên xwe mezin û berfireh kir. Di sala 2016’an de bi kongreyekê Tevgera Azadiya Jinên Êzidî ( TAJÊ) hat ava kirin. Heya niha em wekî jinên Êzidî li Şengalê xebatên xwe berdewam dikin.”
Navê welat û saziyên ku name ji wan re hatiye şandin bi vî rengî ne:
-Serokatiya Efrîkaya Başûr
-Protokola Merasîma Dewletê ya Îtalyayê
-Ofîsa Serokkomar û Têkiliyên Dîplomatîk ên Giştî yên Bulgaristanê
-Ofîsa Serokkomarê Komara Slovakyayê
-Serokkomarê Slovenyayê
-Wezareta Derve ya Fransayê
-Serokkomarê Komara Fînlandiyayê
-Serokkomarê Qibrisê
-Serokkomarê Komara Hirvatistanê
-Wezareta Karên Derve ya Maltayê
-Wezareta Karên Derve û Bazirganiyê ya Macaristanê
-Serokkomarê Awûsturya
-Ji bo Serokkomarê Yewnanistanê
-Serokê Hikûmeta Spanyayê
-Wezareta Karên Derve ya Çînê
-Ofîsa Serokatiya Hindistanê
-Serokatiya Komara Erebî ya Misrê
-Serokkomariya Lîtvanyayê
-Birêz António Guterres, Sekreterê Giştî yê Neteweyên Yekbûyî
