Sala borî Kurdên ku li gel stranên bi Kurdî govend gerandine, li ser medyaya dijîtal bi rêya polîtîkayeke nijadperest bûn hedef. Di encama parvekirinên hesabên nijadperest û milîtarîst ên li ser medyaya dijîtal de li gelek deverên Kurdistan û Tirkiyeyê gelek kesên di dawetan de li gel stranên Kurdî govend gerandine hatin binçavkirin. Hejmara kesên ku bi vê hincetê hatin binçavkirin û piştre jî hatin girtin roj bi roj zêde bûn. Li Sêrtê jî heman bûyerê rû da û darizandina 5 kesên ku ji ber govendgerandinê hatibûn binçavkirin ku 2 jê zarok in, encimî. Li du zarokên ku piştî mehekê di bin çavan de mane, bi hinceta ‘’kirina propogandaya rêxistinê’’ 6 meh 20 roj cezayê hepsê hate birîn û li jinên ciwan ên bi navê Tulîn Taşkesen, Zehra Alver û Edanûr Taşkesen 10 meh cezayê hepsê hate birîn. Dadgehê bi hinceta ku kesên navborî bi rêya strana ‘’Lêxe Gerîla Lêxe’’ ‘’çalakî rewa kirine’’ ceza li jinên ciwan biriye.
Sala borî li navçeya Misircê ya Sêrtê di dawetekê de zarok û jinên bi navên A.T. (17), S.T. (17), Edanûr Taşkesen (19), Fîlîz Taşkesen ( 42) ve Tulîn Taşkesen (21) bi hinceta ku di dawetekê de li gel strana ‘’Lêxe Gerîla Lêxe’’ govend gerandine, li ser medyaya dijîtal ji aliyê hesabên nîjadperest ve hedef hatin girtin. Piştî demeke kurt zarok û jinên berbehs hatin binçavkirin û 2 jê zarok 4 kes hatin girtin. Li Zehra Alverê cezayê hepsa malê hate birîn. Zarok û jinên ciwan di 16’ê Tebaxê de li gel rûniştina yekemîn a li 2’yemîn Dadgeha Cezayê Giran a Sêrtê hatin berdan. Darizandina piştî tehliyekirinê bi dawî bû.
GERANDINA GOVENDÊ WEKE AZADIYA XWEÎFADEKIRINÊ NEHAT QEBÛLKIRIN!
Dadgehê li jinên ku bi hinceta gerendina govendê bi sûcdariya ‘’kirina propogandaya rêxistinê’’ tên darizandin, bi hincetên trajîkomîk ceza birîn. Jina bi navê Fîlîz Taşkesen hate berdan lê belê li du zarokan re 6 meh 20 roj û li jinên ciwan jî 10 meh cezayê hepsê hate birîn. Heyeta dadgehê di biryara xwe diyar kir ku gerandina govendê ji sînorên azadiya xweîfadekirinê derbas dibe. Her wiha dadgehê di biryara xwe de gerandina govendê weke lidarxistina çalakiya propogandayê nîşan daye.
Parêzeran îtîraz li cezayên hatine birîn, kirin û dosya birin Dadgeha Îstînafê.
