Hevseroka Ofîsa Plankirin û Serjimariyê ya Kantona Firatê Emîne Hisî têkildarî serjimariya gel a Kantona Firatê ji ANF’ê re axivî û got, armanca wan derxistina jimarnameyeke giştî ya ji bo gel e.
Emîne anî ziman ku ev projeya wan a sereke ya sala 2025’e û got: “Projeya me ya sereke ku îsal divê me kiriba ew jî jimarnameya giştî ya gel e. Ev bû meheke plan jêre tê kirin û îro jî me xiste meriyetê. Tîmekî taybet ji bo bikaribe serjimariyê bigire me daye perwerdekirin. Lewra jî ji aliyê Rêveberiya Xweser a kantona Firatê ve jî qedexeya derketina derve hat ragihandin da ku ew tîmên ku serjimariyê kom dikin bikaribin bi teqezî kom bikin.”
Emîne diyar kir ku 4 hezar tîm hatine amadekirin ku her komek ji du kesan pêk tê, hejmara giştî 8 hezar kes in û wiha bilêv kir: “Tîmên me ji kesên di nava saziyên Rêveberiya Xweser de û mamosteyan pêk tên, ew tîm hatine perwerdekirin û niha jî di nava gel de serjimariyê kom dikin.”
Emîne Hisî destnîşan kir ku ew weke Ofîsa Plankirin û Serjimariyê got, “Ji bo derxistina projeyên bi sûd ji bo gel me dest bi komkirineke teqez û naskirina hejmara kesên ku li vir jiyan dikin kir. Her wiha ji bo nirxandina rewşa kesên ku li vir jiyan dikin jî me dest bi serjimêriyê kir.”
Emîne ragihand ku îro di danê sibehê de dest bi komkirina serjimariyê li seranserî komîn û meclîsan kiriye û wiha axaftina xwe bi dawî kir: “Piştî ku tîmên me li seranserî malan bigerin, wê wan serjimêriyan radestî komîn û meclîsên xwe bikin û li gorî wê ew ê teslîmî Ofîsa Plankirin û Serjimariyê bikin. “
Hêjayî bi bîrxistinê ye ku di danê sibehê de li seranserî Kantona Firatê bajarê Mezin Kobanê, bajarê Qinê, SIrîn, Çelebiyê û Eyn Îsa dest bi komkirina serjimariyê kirine. Di heman demê de li tevahî gundewarên Kantona Firatê jî ji aliyê komîn û meclîsan û tîmên hatine erkdarkirin ve dest bi komkirina serjimariyê tê kirin.
