Platforma Jinan a Şahmaran li dijî komkujiyên li ser jinan li navçeya Qoserê meş li dar xist û daxuyanî da. Jin li Parka Mehmet Sincar hatin ba hev û heta Qada Azadiyê meşiyan. Parlamentera DEM Partiyê ya Mêrdînê Bêrîtan Guneş Altin, aktivîstên Tevgera Jinên Azad (TJA) û gelek jin tevlî meşê bûn. Di meşê de pankartên “Em li gel jin û zarokan in, li dijî taritiyê ne” û “Em ê pergala serwer a mêr hilweşînin” hatin hildan. Jinan di meşê de bêyî navber dirûşmeyên “Qetilkirina jinan polîtîk e”, “Bijî têkoşîna jinan” û “Jin, Jiyan, Azadî” berz kirin.
Piştî meşê jinan li Qada Azadiyê daxuyanî da. Endama Platforma Jinan a Şahmaran Muruvvet Çam axivî. Çam diyar kir ku komkujiyên jinan ji aliyê pergala serdest a mêran ve têne veşartin û wiha got: “Jiyana me, ti kesî ne di ewlehiyê de ye. Jiyana exlaqî û siyasî wê bi têkoşîna jinan ve zindî bibe. Em ê li hemberî şerê taybet, destdirêjiyê û îstîsmara zarokan bêdeng nemînin. Em ê serî li ber necezakirina sûcan netewînin. Em bang li hemû jinan dikin ku li dijî tundiyê têkoşîneke hevpar bikin.”
Parlamentera DEM Partiyê ya Mêrdînê Bêrîtan Guneş Altin jî axivî û got: “Her roj jin tên qetilkirin, zarok rastî îstîsmarê tên. Lê pergal li dijî vê bêdeng dimîne. Kujer bi bêcezakirinê tên xelatkirin. Em ê rê nedin vê rizîbûnê û em ê li her derê xwe bi rêxistin bikin. Birêz Abdullah Ocalan bi perspektîfa civaka demokratîk, ji bo li dijî qetilkirina jin û zarokan çareseriyek pêşniyar kir. Di civakeke demokratîk de cih ji qetilkirina jinan re tine ye. Divê her kes xwedî li vê pêvajoyê derkeve û li dijî qirkirina jinan raweste.”
Daxuyanî bi dirûşmeyên “Jin, Jiyan, Azadî” û “Qetilkirina jinan polîtîk e” bi dawî bû.
