Hevserokê Wanê yê DBP’ê hiqûqnas Cemal Demîr got, “Ji bo Birêz Abdullah Ocalan karibe rol û mîsyona xwe ya dîrokî bi cih bîne divê bi rengekî fîzîkî azad be.”
Hevserokê Bajarê Wanê yê DBP’ê parêzer Cemal Demîr ji ANF’ê re axivî û anî ziman ku komîsyona li meclîsê ava bûye hîn xwe ji kodên xwe yên jiberkirî rizgar nekiriye. Demîr destnîşan kir ku komîsyon ji bo karibe bigihêje armanca xwe ya damezrandinê divê rapora xwe li ser du sernavên bingehîn amade bike û ev pêşniyar kir:
“* Hiqûq Pêvajoya Derbasbûnê: Ji bo mirovên li girtîgehê, li sirgûnê û hatine krîmînalîzekirin karibin li jiyana siyasî û civakî vegerin, di qanûna înfazê û TCK’ê de guhertin bê kirin.
* Çareseriya Mayinde: Ziman û çanda Kurd di asta destûra bingehîn de bêne qebûlkirin, pêşî li perwerdeya bi zimanê dayikê bê vekirin û welatîbûna destûra bingehîn jinûve bê pênasekirin.
BIRYARA DADGEHA MAFÊN MIROVAN A EWROPAYÊ Û MAFÊ HÊVIYÊ
Demîr bal kişand ser rola Rêber Apo ku aktorê sereke yê pêvajoyê ye û got, “Ji bo Birêz Abdullah Ocalan karibe rol û mîsyona xwe ya dîrokî tam bi cih bîne bêguman azadiya wî pir pir girîng e. Misogerkirina vê azadiyê xwedî sparteyeke hiqûqî ye. Dadgeha Mafên Mirovan a Ewropayê (DMME) di biryara xwe ya Adara 2014’an de naverokek destnîşan kir ku nabe ti kes heta dawiya emrê xwe di girtîgehê de bimîne. Ji vê re ‘mafê hêviyê’ got. Dewleta Komara Tirkiyeyê li gorî xala 90’î ya Destûra Bingehîn mecbûr e ku vê biryarê bi cih bîne.”
GUHERTINÊN BIÇÛK TÊRÊ DIKIN
Demîr diyar kir ku ji bo bicihanîna ‘mafê hêviyê’ guhertineke biçûk a li qanûna înfazê têrê dike û got, divê qanûna ku dibêje cezayê girtîgehê yê heta bi hetayê yê girankirî heta dawiya temen bi cih bê anîn, bê rakirin.
Demîr got, “Ji bo Birêz Abdullah Ocalan karibe di vê pêvajoyê de mîsyona xwe, rola xwe ya dîrokî bi cih bîne, şert û mercên azadiya fîzîkî bêne bicihanîn. Divê ‘mafê hêviyê’ bi cih bê anîn ku mercên objektîf û sûbjektîf ên pêşveçûna pêvajoyê bêne afirandin.”
