Di saetên sibehê yên îro de, bi hezaran kes ji bo beşdarî şahiya Cejna Berxwedana Netew bibin, berê xwe dan Binarê Qendîlê. Şahiya Cejna Berxwedana Netewî ya Binarê Qendîlê îro di saet 13:00’an de destpê kir. Qada şahiyê bi alên PKK, KCK, PAJK, KJK, posterên Rêber Apo û şehîdên pêşeng hat xemilandin.
Şahiya Cejna Berxwedana Netewî ya Binarê Qendîlê bi deqeyek rêzgirtinê ji bo şehîdên Tevgera Azadiya Kurdistanê li ber Sîrûda Netewî Ey Reqîb, bi qêrîna dirûşmeyên ‘Bijî Serok Apo’, ‘Jin Jiyan Azadî’ bi coş û xuroşeke mezin destpê kir.
Piştre peyama Melisa Gel ya Binarê Qendîlê ya têkildarî Cejna Berxwedana Netewî hate xwendin. Peyam ji aliyê Hevseroka Meclisa Gel a Binarê Qendîlê Lavan Mistefa ve hate xwendin.
Di peyamê de wiha hate gotin; “27’ê Mijdarê ne tenê damezirandina partiyekê ye, belkû werçerxeke ji tarîbûnê ber bi ronîbûnê ve ye. Şikandina gorê bû ku ji bo Kurdan hatibû danîn. PKK felsefeyeke jiyana nû bexşand ku têde kesayeta Kurd fêr bû ku çawa serbilind bijî. Vê tevgerê hemû sînor derbas kirin. Bi projeya netewa demokratîk û felsefeya ‘Jin, Jiyan, Azadî’ ji bo hemû Rojhilata Navîn bû nasnameya azadiyê. PKK bi qasî hêza şere, ewqasî xwedî îradeyeke ya aştiyê ye. Aştiyeke bê azadiya fîzîkî ya Rêber Apo pêş nakeve. Nexşeya çareseriyê Îmralî ye.”
Her wisa di beşeke din ya şahiyê de, hunermend Ferman Hewramî, hunermend Îbo Qamişlo, Koma Awazên Çiya, bi stranên xwe şahiya Cejna Vejînê germ kirin. Her wisa Koma Zarokan ya Binarê Qendîlê bi pêşkeşkirina hunera xwe, beşdariya xwe ji şahiyê re çêkirin.
Pîrozbahî li ber stranên hunermendên beşdar bi gerandina govenda azadiyê û berzkirina dirûşmeyên ‘Bijî Serok Apo’, ‘Şehîd Namirin’ û ‘Jin Jiyan Azadî’ bidawî bû.
