Serokkomar û Serokê Giştî yê AKP’ê Recep Tayyîp Erdogan piştî Civîna Kabîneyê daxuyanî da. Erdogan behsa “kevneşopiya dewletê û zexmbûna gel kir” û got, “Tirkiye dê zû yan dereng teqez bigihêje armancên xwe.”
Erdogan têkildarî Pêvajoya Aştî û Civaka Demokratîk axivî û diyar kir ku armanca vê pêvajoyê ew ku “astengiyên herî mezin ên li pêşiya aborî, aştî û xwişk-biratiyê ji holê rake.” Erdogan diyar kir ku ev pêvajo dê deriyê serdemeke nû veke.
Erdogan, ku bal kişand ser dîroka hevpar a bi civakên Kurd, Ereb û Tirkmenan û destnîşan kir ku herêm niha “bi xwînrijandin û pevçûnan têr bûye.” Erdogan diyar kir ku divê civak li hember provokasyonan bi aqilêselîm tevbigere û got, “Em berevajî kesên ku razemeniyê li xwînrijandin û kaosê dikin, bi xwişk-biratî hev re ser bikevin.” Erdogan anî ziman ku ev pêvajo dê “nifşê xwişk-biratiyê xurt bike û hemû planên qirêj têk bibe” û wiha domand, “86 milyon welatî wê bi hev re re, Tirkiyeyê bikin sedsala 21’an. Bila gumana kesî tine be, em ê van armancan mil bi mil pêk bînin.”
