Alîkarê Serokê DÎTAM’ê Bariş Yavûz anî ziman ku ji bilî DEM Partî û MHP’ê hemû partiyên din bi fikara dengan tevdigerin, li gorî anketan nêzîk dibin û got, “Nabe ku ev pêvajo weke amûrekê bê bikaranîn. Pêvajoya çareseriyê gelekî girîng e ku nabe ji hesabên hilbijartinê re bibe qurban.”
Alîkarê Serokê Navenda Lêkolînên Civakî ya Dîcleyê (DÎTAM) Parêzer Bariş Yavûz işaret bi girîngiya hevdîtina komîsyonê ya bi Rêber Apo re kir û li ser asta heyî ya pêvajoyê û sererastkirinên qanûnî yên divê bêne kirin ji ANF’ê re axivî.
NABE KU JI BO HESABÊN HILBIJARTINÊ BÊ BIKARANÎN
Yavûz ragihand ku hevdîtina komîsyonê ya bi Rêber Apo re pêvajo derbasî qonaxeke cuda kiriye û destnîşan kir ku cewhera pirsgirêkê têkildarî demokratîkbûnê ye. Yavûz got, “Her çend desthilatdarî vê pêvajoyê weke ‘Tirkiyeya bê teror’ pênase bike jî, ya rast mesele li ser demokratîkbûna Tirkiyeyê ye.” Yavûz di dewama axaftina xwe de got, “Ev mijar temamiya welêt eleqedar dike û çareserî jî bi îradeya hevpar a hemû beşên siyasî û civakî dibe. Hemû partiyên li Meclîsê têne temsîlkirin diviyabû bi Abdullah Ocalan re hevdîtin bikira. Eger ev mesele ya Tirkiyeyê be, diviyabû komîsyona ji hemû partiyan hevdîtin bi Ocalan re bikira. Lê belê em dibînin ku gelek partî li gorî hilbijartinê nêzî pêvajoyê dibin û bi wî rengî tevdigerin. DEM Partî û MHP di vê pêvajoyê de guh nadin dengan, lê belê partiyên din li gorî anketan pozîsyona xwe diyar dikin. Nabe ku partiyên siyasî vê pêvajoyê weke amûrekê bi kar bînin. Nabe ku pêvajoya çareseriyê ji bo hesabên hilbijartinê bikin qurban.”
HEVDÎTIN WÊ PÊVAJOYÊ HÎN BI LEZ BIKE
Yavûz anî ziman ku hevdîtina bi Rêber Apo re cudahiyeke girîng ji dema derbasbûyî bi xwe re aniye û got, “Hevdîtinên beriya niha bi giranî bi rêya navbeynkaran dihatin kirin. Tiştên di hevdîtinên berê de dihatin gotin, timî ji serokkomar an jî partiyên siyasî re dihatin vegotin. Ji ber vê yekê di pêvajoyê de dem derbas dibû agahî kêm dibû. Lê belê vê carê hevdîtin yekser hate kirin û ev yek wê pêvajoyê hîn bêhtir bi lez bike. Têkildarî naveroka hevdîtinê agahiyek bi raya giştî re nehatiye parveıkirin, lê belê li gel vê yekê hevdîtina yekser a bi Abdullah Ocalan re wê pêşî li pêvajoyê veke. Hînbûna gotinên Abdullah Ocalan bi rengekî yekser tê wê wateyê ku mekanîzmaya navbeynkariyê ji holê rake. Ev jî wê pêvajoya çareseriyê bi lez bike, lewma gelekî girîng e.”
‘QANÛNA TÊKOŞÎNA LI DIJÎ TERORÊ’ DIVÊ BÊ RAKIRIN
Yavûz bi bîr xist ku wezîfeya komîsyonê wê bi 31’ê Kanûnê re bi dawî bibe û got, “Heta vê demê tê payin ku raporekê amade bike û pêşkêşî raya giştî bike. Li ser vê rapora ku weke ‘Perspektîfa Demokratîk’ tê pênasekirin, bendewariyek heye. PKK’ê berpirsyariyên xwqe bi cih anî. Qonaxa ji niha û pê ve gavên qanûnî ye ku divê dewlet biavêje. Komîsyon nikare yekser qanûnê derxîne, lê belê dikare pêşniyaran û pêşnûmeyê amade bike. Bendewariya me jî ji vî alî ve ye. Şert ku pêvajo li ser zemîna hiqûqî bê rûniştandin. Pêwîstî bi sererastkirinên hiqûqî heye. Divê em vê pêvajoyê ji aliyê hiqûqî û sererastkirinan ve bişopînin. Divê Qanûna Têkoşîna li dijî Terorê (TMK) ji meriyetê bê rakirin. TMK qanûneke xumamî û nediyar e. Xwedî wê taybetmendiyê ye ku dikare her kesî bike sûcdarê terorê yê gengaz. Ji sala 1991’ê û vir ve dibe esasê nîqaşan û pirsgirêkan bi xwe re tîne. Bi hezaran kes hene ku ji endametiya rêxistinê ceza li wan hatiye birîn. Têkildarî girtiyên nexweş pêwîstî bi sererastkirinê heye. Em neçar in ku vê pêvajoyê li ser metnên hiqûqî bişopînin. Eger dewlet bi berpirsyariya xwe rabe û sererastkirinên pêwîst bixe meriyetê hem aştiya civakî hem jî pêvajoya demokratîkbûna Tirkiyeyê wê di asteke girîng de bi pêş ve biçe.”
