Meclisa Malbatên Şehîdan ya bajarê Tirbespiyê yê kantona Cizîrê ji bo gerîlayê HPG`ê Sîpan Sîdar (Sîpan Muhyeddîn Hesen) ê 20’ê Gulana 2024’an li herêma Metînayê şehîd bûbû, konê sersaxiyê li pêşiya wî ya li bajarê Tirbespiyê veda û merasîmek li dar xist.
Di merasîmê de bi dehan şêniyên bajêr û nûnerên saziyên civaka sivîl amade bûn. Konê sersaxiyê bi wêneyên Rêber Apo û wêneyên şehîd Sîpan Sîdar hatibû xemliandin.
Merasîma sersaxiyê bi deqeyeke rêzgirtin ji bo bîranîna şehîdên têkoşîna azadiyê dest pê kir.Piştre bi navê Meclisa Malbatên Şehîdan a bajarê Tirbespiyê Nûredîn Şakir axivî û got ku ew bi saya şehîdên mîna Sîpan û bi fikir û felsefeya Rêber Apo derbasî pêvajoyeke nû ji bo aştî, xwişk û biratiyan gelan dibin.
Nûredîn Şakir soza domandina rêya şehîdan da û banga parastina destkeftiyên wan kir.
Yek ji endamên Meclisa Leşkerî ya Tirbespiyê Çekdar Tirbespiyê axivî û got: “Em wekî QSD`ê bi her şehîdekî/ê re, soza xwe ya parastina pêkhateyên Bakur û Rojhilatê Sûriyeyê û berdewamiya têkoşîna ji bo avakirina sûriyeyeke demokratîk ya nenavendî nû dikin.”
Di dema merasîmê de endama Partiya Yekitiya Demokratîk (PYD) Munteha Mehmûd destnîşan kir ku Rojhilata Navîn di qonaxeke nû re derbas dibe, lew ra tê xwestin ku pêhateyên Bakur û Rojhilatê Sûriyeyê yekitiya xwe xurt bikin. Munteha Mehmûd got: “Çawa şehîd Sîpan ji bo mafên hemû pêkhateyan berxwedanî dikir, divê em jî di aliyê siyasî û civakî de berxwedanê xwe xurtir bikin.”
Bi navê Kongreya Îslama Demokratîk Mela Abdullah Omer anî ziman ku şehadet, bi taybetî şehadeta li dijî zulm û dagirkeriyê nirxekî pîroz e.
Li ser navê malbata şehîd Sîpan Sîdar, Apê wî Ebdurehman Hesen axivî û da zanîn şehîd Sîpan her tim behsa mafên hemû pêkhateyên Rojhilata Navîn dikir.
Hesen got: “Wekî malbat em bi şehadeta wî serferaz in. Em soz didin ku em ê şopdarên rêya wî ya hemû hevrêyên wî bin.”
Piştî axaftina wesîqeya şehîd Sîpan hat xwendin û radestî malbata wî hat kirin.
Merasîm bi berzkirina dirûşmên dilsoziya bi şehîdan re bi dawî bû.
