Serê sibehê hêzên hikumeta veguhêz a Sûriyeyê destûr da otobus û rêwiyan ku ji Bakur û Rojhilatê Sûriyeyê ber bi hundirê Sûriyeyê ve li ser rêya Tebqa-Esreya biçin û bên.
Hikumeta veguhêz a Sûriyeyê ev rê di 5`ê Cotmehê de bêyî ku tu hincetekê nîşan bide, girtibû.
Li gorî şofêrên otobusan ên ji hundirê Sûriyeyê tên, hêzên hikumeta veguhêz a Sûriyeyê yên ku li xala kontrolê ya Zekiya ya nêzîkî Esreya ya li gundewarên Hemayê bi cih bûne, ji wan re ragihandiye ku rê dê her roj ji saet 06:00`an heta 18:00`an vekirî be û şevê jî tenê ji bo rewşên girîng ên tenduristî û mirovî vekirî be.
Rêya Dêr Hafir-Helebê ji 2 mehan zêdetir e girtî ye. Rê di 25`ê Mijdarê de ji bo demeke kurt hat vekirin, paşê hêzên hikumeta veguhêz dîsa girt.
