Meclisa Malbatên Şehîdan a Bajarê Til Temirê merasîma cenaze yê şervanê Hêzên Komandos ên QSD’ê Behrî Serêkaniyê (Îzedîn Ehmed Ehmed) ê ku 15’ê Mijdara îsal li bajarê Holê di dema pêkanîna erka xwe de şehîd bibû li dar xist.
Merasîm li pakrewangeha bajar hat lidarxistin. Bi sedan şêniyên Til Temirê, endamên saziyên sivîl, nûnerên partiyên siyasî, koçberên Serêkaniyê yên li kampa Serêkaniyê ya li bajarê Hesekê beşdarî merasîmê bûn.
Piştî rêzgirtinê, Hevserokê Meclisa Malbatên Şehîdên Serêkaniyê Beşar Goşî axivî û got: “Em bejna xwe li ber cenazeyê şehîd Behrî Serêkaniyê ditewînin ku di dema pêkanîna erka xwe ya neteweyî de tev li karwanê rûmetê bûn. Bi saya keda şehîdan aramî mîsoger bû. Şehîdan hêz da me ku em li hemberî hemû zehmetiyan li ber xwe bidin. Her çiqasî dijminên me hewl dan ewlehiya herêmê me têk bibin, li pêşberî mîrateya şehîdan, israr û lehengiya gel ku nayê şikandin, rû bi rû man.”
Ji fermandarên Meclisa Leşkerî ya Til Temirê Îsa El Receb jî anî ziman ku keda şehîd Behrî û tevahî şehîdan vala neçe û got, dê heya serketinê şopdarên rêya şehîdan bin.
Bi navê malbata şehîd Behrî, nûçegihanê ANHA’yê Diyar Ehmed axivî û bi van gotinan behsa şehîd Berhî kir “Sînorê ku gelê vî welatê xêz kirine, ne sînor ên li ser nexşeyan e an jî dabeşkirina erdîngariyê ye. Lê me bi xwîna şehîdan û berdêlan, bi yekitiya pêkhateyan û bi rûmeta ku nayê kirin û firotin xêz kiriye.”
Diyar Ehmed di dewama axaftina xwe de destnîşan kir ku “li ser axa Bakur û Rojhilatê Sûriyeyê nexşe bi hibirê nayê xêzkirin, lê bi gavên şervanan û bi xwîna zêdetirî 25 hezar şehîd û birîndaran hatiye xêzkirin. Ji 14 salên şoreşê ve em bi xurtî li hemberî zulmê li ber xwe didin, bi lehengiyê li hemberî tirsê şer dikin û bi israrê li hemberî dagirkeriyê tê dikoşin. Em gav paşde neavêjin, ji ber em dizanin ku em ne tenê erdekî, lê di heman demê de em rûmeta gel û siberoja nifşan jî diparêzin.”
Piştî axaftinan nasnameya şehîd hat xwendin û radestî malbata wî hatin kirin. Cenazeyê şehîd bi tilîliyên dayikan û dirûşmên dilsoziya bi şehîdan re spartin axê.
