Endamê Meclîsa Partiya Jiyana Azad a Kurdistanê (PJAK) Mazlûm Heftan qala fermandara Hêzên Parastinê yên Jinê yên Rojhilatê Kurdistanê (HPJ) Aryen Arê kir ku di 3’ê Kanûna 2023’an de di êrişeke artêşa dewleta Tirk de şehîd bû.
Nirxandina Mazlûm Heftan bi vî rengî ye:
“Ez Şehîd Aryen Arê û hemû şehîdên şoreşê bi rêz û minet bi bîr tînim. Şehîd Aryen bi navê xwe yê li malê Zeyneb Êwerî, fermandara me ya hêja di 3’yê Kanûna 2023’yan de tevlî karwanê şehîdan bû. Di nava malbat û derdoreke welatparêz ji dayîk dibe. Malbat bi giştî malbateke welatparêz e û ji nava malbatbatê hem tevlîbûn hene hem jî şehîdên wê hene. Malbat, ji zû ve ye Tevgera Apoyî nas dike. Devereke wisa ye ku Tevgera Apoyî ji zû ve ye li wir heye. Rêber Apo û Tevgera Apoyî nas dikin. Piraniya deverê welatparêz e. Ji Makû, Çaldiran bigirin heya Xoy, Kotol, Selmas û Biradost deverên wisa ne ku di dîroka wan de serhildan, berxwedan, xwedîderketina nasnameyê heye.
Çîrokên Kela Dimdimê û yên weke wê yên ji van herêman e. Şehîd Aryen jî ji çand û ferhengeke wisa tê. Li herêmên berbehs welatiyên ji eşîrên weke Celalî, Şikakî, Pinyanişî, Evdoyî, Hirçoyî, Herkî û Milî dijîn. Bi giştî herêm xwedî dîrokeke berxwedanê ye. Hem taybetmendiyên deverê hem jî yên malbatê bandorê li Şehîd Aryen dikin û kesayeteke berxwedêr û serhildêr li cem peyda dibe.
Şehîd Aryen Arê bi taybetî di sala 1999’an de dema ku Rêber Apo bo Komploya Navneteweyî dîl tê girtin, Tevgera Apoyî nas dike, têkildarî meseleya Rêber Apo û meseleya Kurdan mereqa wê çêdibe. Li gorî şert û merc û derfetên xwe dixwaze di nava Şoreşa Kurdistanê de para xwe jî çêbike û barekî hilgire ser milên xwe. Li gorî derfetên xwe dest bi lêgerînan dike û di sala 2006’an de tevlî nava refên gerîlayan dibe. Serdema naskirina Tevgera Apoyî serdemeke girîng e. Yanî serdema Komploya Navneteweyî ya 1999’an ji bo hemû gelê Kurd xaleke esas e. Ji bo heval Aryen jî wisa ye.
Heval Aryen Arê di sala 2006’an de beşdar dibe ku sala 2006’an bi giştî ji bo Rojhilatê Kurdistanê saleke girîng e. Dagirkeriya Îranê di sala 2006’an de li Makûyê komkujiyek pêk anî. Di wê serdemê de gelê me ji bo mafê xwe yê rewa û daxwazên xwe yên rewa radibe û 6 welatparêzên me tên qetilkirin. Bi vê wesîleyê wateyeke cuda ya beşdarbûnên wê salê heye. Beşdarbûna jinên ji wê herêmê peyameke esasî ye.
Heval Aryen dema ku beşdar dibe girêdayî esasên pîvanên şervantiya rast a Rêber Apo û fedaiyane beşdarî xebatan dibe. Li gelek deverên cuda dimîne. Digihîje heya asta fermandariya HPJ’ê. Heval Aryen, piştî beşdarbûna xwe bi pîvanên xizmetkirina rastîn û fedaîtiya Rêber Apo beşdar dibe. Li deverên cuda cuda şervantî û fermandariyê dike. Ji Xakûr heya Penciwînê, ji Makû heya Şahoyê xizmet, şervantî û fermandariyê dike. Li ser rastiya Rêber Apo, şehîdan gelê me bi ked û hewleke mezin xwe perwerde dike û pêş dixe. Bi keda xwe digihîje heya asta fermandariya HPJ’ê. Dibe Endama Fermandariya Konseya me. Li ser vî esasî pêşengtiyê dike. Rastiya jinan girêdayî ferheng û felsefeya Rêber Apo nas dike. Hewl dide ku bibe jin û fermandereke pêşeng. Li gorî felsefeya ‘Jin, Jiyan, Azadî’ xwe pêş dixe û pêşengtiyê dike.
Ez dikarim têkildarî taybetmendiyên kesayeta Şehîd Aryen van yekan bibêjim. Gelekî mutewazî bû. Dema ku mirovî ew dît, nedizanî bê ka şervan e yan fermandar e. Her çend fermandareke pêşeng jî bû ku bi keda xwe gihîştibû wê astê, bi rastî jî di nava jiyanê de bi şervanan re şervan bû, bi ciwanan re ciwan bû û bi temenmezinan re jî keseke temenmezin bû. Beşdarbûna jiyanê di hemû aliyên wê de xwe nîşan dida. Ji bilî mutewazîbûnê pêşengtiya wê gelekî derdiket pêş û diyar bû. Hevrêyên xwe perwerde dikir, ew pêş dixistin û birêxistin dikir.
Li ser esasê ku hevrêyên wê di pêşerojê de bibin fermandar, alikariya wan dikir. Ji hevrêyên xwe re hemû kar û xizmet dikir. Taybetmendiyeke Şehîd Aryen ew bû ku gelekî girêdayî xeta Rêber Apo û xeta şehîdan bû. Hewldana wê ya esasî ew bû ku rastiya Rêber Apo bi temamî fêm bike û di pratîkên xwe de nîşan bide û li gorî vê yekê dixebitî û hewl dida. Taybetmendiyeke wê ya din ew bû ku keseke rûken bû.
Hevalên ku pê re mane û ew dîtine rûyê Şehîd Aryen yê bi ken tu caran ji bîr nakin. Tim û tim bi moral û kelecan bû. Tim digot ku divê em şoreşê pêk bînin. Hêz û cesareteke mezin dida derdora xwe. Bi perwerdeyan re gelekî mijûl dibû. Ji perwerdeya şervanên nû bigirin heya akademî û perwerdeya gel li ku derê kar dikir, gelekî girêdayî karê xwe û rêxistinê bû. Li ser esasê garantiya serkeftina me gelê me ye û wisa nêzîk dibû. Ji bo çareseriya pirsgirêkan serî li metoda çareserkirina rêxistinê dida. Rê nedida tu kesî ku zirarê bide rêxistinê. Tu caran astengî, pirsgirêk û zehmetî ji xwe re nedikirin hincet. Her tim ji bo ku bar rabike, barê rêxistin, Rêbertî û hevrêyên xwe sivik bike di nava hewldanan de bû. Her tim pêşengtî dikir.
Rêbaza jiyana wê bi awayekî erênî bandor li însanan dikir. Tu caran nedisekî, tim û tim kar dikir. Rêber Apo gotiye ku silavên min li kesên ku kar dikin bikin. Li gel vê yekê mirov fêm dike ku heval Aryen ev rastî fêm kirine û ji bo layiqbûna silavên Rêber Apo kar dikir. Wate li karê xwe zêde dikir. Û derdora xwe jî girêdayî vê rastiya rêxistinê koordîne dikir. Li hemberî dijmin li cem hêrseke mezin hebû.
Ev taybetmendî hemû bûbûn sedem ku heval Aryen bibe fermandara şerê serdemê. Bibe fermandareke layiqî Rêber Apo û sedemê. Li ser vî esasî ez li ser navê Şehîd Aryen Arê – Zeyneb Êrewî careke din ji hemû şehîdên şoreşê, azadiyê û demokrasiyê re rêz û hurmeta xwe diyar dikim.’’
