Li girtîgehan binpêkirina mafên mirovan a li hemberî girtiyan her roj zêde dibe. Girtîgeha Girtî ya bi Tîpa L a Kalkandere ya Rîzeyê, bi binpêkirina mafên mirovan a li hemberî girtiyên siyasî careke din kete rojevê. Girtî Erdem Akti, Giyasettîn Aydin, Mehmet Aydin Sogut, Mehmet Şiyar Kayadag, Ûmût Savaş Koçyîgît û Nejdet Tarlak ê ku beriya sê mehan hate berdan, bi hinceta ku perwerdeya Kurdî dane hatin cezakirin.
Li gorî agahiyan, rêveberiya girtîgehê destpêkê cezayê hucreyê li girtiyên navborî birî. Piştî vî cezayî jî girtiyên siyasî ji bo girtîgehên cuda hatin sirgûnkirin. Demekê piştî sirgûnkirinê lêpirsîna ji aliyê desteya dîsîplînê ya girtîgehê ve hate destpêkirin veguherî dosya dozê.
Nejdet Tarlak ê beriya sê mehan hate berdan ji ANF’ê re qala binpêkirina mafên mirovan û pirsgirêkên li girtîgehan ên girtiyên siyasî lê rast tên.
Tarlak got, “Li girtîgehê li gel şeş hevalên ku em bi hev re man, doz li hemberî me hate destpêkirin. Hinceta destpêkirina dozê jî ‘Perwerdeya Kurdî’ hate nîşandan. Destpêkê cezayê hucreyê dan, piştre jî hin hevalên me hatin sirgûnkirin. Piştre lêpirsîna rêveberiya girtîgehê veguherî dozê.
Li dû lêpirsînê ez şandin Girtîgeha Girtî ya bi Tîpa S a Kirşehîrê, hevalên min Şiyar Kayadag şandin Girtîgeha Girtî ya bi Ewlekariya Bilind a Kirşehîrê, Ûmût Savaş Koçyîgît şandin Girtîgeha Girtî ya bi Hejmara 1’ê ya Sîncanê, Erdem Akti şandin Girtîgeha Girtî ya bi Hejmara 2 a Sîncanê, Giyasettîn Aydin şandin Girtîgeha Girtî ya bi Tîpa S a Çarşamba ya Samsûnê, Mehmet Aydin Sogut jî şandin Girtîgeha Girtî ya Kavak a Samsûnê.
Mehmet Aydin Sogut ku diviyabû bihata berdan, berdana wî bi rengekî kêfî hate taloqkirin. Bi hinceta ku cezayê hucreyê lê hatiye birîn berdana Giyasettîn Aydin jî hate taloqkirin.”
Tarlak ragihand ku li Girtîgeha Kalkandere ya Rîzeyê zext bi rêk û pêk bûne û got, “Li hemberî girtiyên siyasî polîtîkaya tepisandinê li girtîgehan tê meşandin. Bi kiryarên kêfî yên rêveberiya girtîgehê ceza têne birîn. Yekane sedema vê jî ew e ku hewl didin îradeya me teslîm bigirin. Naxwazin em li girtîgehê li hev kom bibin. Me li dijî vê helwestê her tim têkoşîn meşand.
Li derve pêvajoyeke aştiyê heye lê belê li girtîgehê mirov nikare qala aştiyê bike. Kiryarên li dijî hiqûqê dewam dikin. Hevalên me yên divê bêne berdan nayên berdan. Kiryarên kêfî divê bi dawî bibin.”
Nejdet Tarlak diyar kir ku divê zextên li girtîgehan bi dawî bibin, hevalên wan ên divê bêne berdan lê belê berdana wan tê taloqkirin divê azad bibin û destnîşan kir ku wê têkoşîna xwe dewam bikin.
