Gelek rêveber û hevserokên di çarçoveya Komeelya Piştevaniya bi Malbatên Xizmên xwe Winda kirine ya li Dergûşa Şaristaniyê (MEBYA-DER) dixebitin bi sûcdariya “Endametiya rêxistinê” têne darizandin. Bi taybetî dayikên ku zarokên wan tevlî PKK’ê bûne dikevin ber lêpirsînê. Yek ji wan dayikan jî Yildiz Damla ya 63 salî ye. Yildiz Damla ku gelek caran hate binçavkirin bi îdîaya “Endametiya rêxistinê” 3 caran kete ber lêpirsînê. Têkildarî Yildiz Damla ku lêpirsînên têkildarî wê hemû kirin yek, di sala 2023’an de dadgeha herêmî biryara beraatê da. Li gel ku biryara beraatê hate dayin jî ji ber îtirazên dozgeriyê dosya hîn li ber destê Dadgeha Bilind e. Parêzera dosyayê Gulistan Ataş got, “Li gel ku pirsgirêka hiqûqî nîne, hewl tê dayin ku sûc bê afirandin.”
Têkildarî Yildiz Damla ku sala 2018’an rêvebera MEBYA-DER’ê bû bi hinceta ku tevlî merasîmên cenazeyan bû, daxuyanî da çapemeniyê û cenazeyên PKK’yiyan şuşt lêpirsîn hate destpêkirin. Sê lêpirsînên ji heman sûcî ji aliyê dadgeha herêmî ve di dozekê de hate komkirin û piştî darizandina ji 5 salan biryara beraatê hate dayin. Lê belê dozgerê dosyayê neraîbûn nîşanî biryarê da. Dadgeha Îstînafê jî biryar li gorî hiqûqê dît, lê vê carê jî dozgerê dadgeha Îstînafê îtiraz kir.
Dosya hîn jî li ber destê Dadgeha Bilind e. Parêzer Gulistan Ataş anî ziman ku şuştina cenazeyan û tevlîbûna li daxuyaniyên çapemeniyê sûc nîne û xwest, biryara beraatê bi cih bê anîn.
Gulistan Ataş ragihand ku qedexeya derketina derveyî welat li hemberî muwekîla wê hatiye danîn û ev pêvajo bi rengekî bêwate tê dewamkirin.
Ataş diyar kir ku di dosyayê de pirsgirêkeke hiqûqî nîne û got, “Li hemberî dayikên ku zarokên xwe li çiyê ji dest dane lêpirsîn zêde bûne. Ev rewş veguheriye pratîkeke zextê ya bi rêk û pêk a li hemberî dayikan.”
