Tora Mafên Mirov ya Kurdistanê di derbarê rewşa girtiyek siyasî yê Kurd li Rojhilatê Kurdistanê de raporek belav kir.
Di raporê de hatiye diyarkirin, girtiyê siyasî yê Kurd yê bi navê Mutelîb Ehmedyan ku 16 salin di girtîgehê de ye, bi gelek nexweşiyan ketiye, yek ji van nexweşiyan jî penceşêra mîdê ye. Hatiye gotin ku rewşa Mutelîb a mana di girtîgehê de dest nade, ji ber vê çendê daxwaza sekinandina proseya bicihanîna cezayê xwe kiriye. Lê ji ber razînebûna dozgerê giştî yê Tehranê, hîna jî ew di rewşek giran a fîzîkî de li Girtîgeha Evîn de tê ragirtin.
Di raporê de hatiye gotin ku di çend salên borî de ji ber paşguhxistin û xemsariya hêzên rejîmê, girtiyê siyasî Mutelîb Ehmedyan neşandine nexweşxaneyên dervey girtîgehê. Ji ber vê çendê jî nexweşî li bedena wê belav bûye. Piştî tûndbûna nexweşiya wî, bijîşk neçar mane ku bi rêya çend neştergeriyek kîsê zirav, beşek ji ciger û rûviyên wî jêvekin.
Her wiha hatiye diyarkirin berpirsên girtîgehê gelek caran astengî derxistine û rê nedane dermanên ji dervey girtîgehê jêre hatine peydakirin, bigihin destan.
Mutelîb Ehmedyan di sala 1983’yan de li bajarê Bane yê Rojhilatê Kurdistanê ji dayik bûye. Di 13’yê Îlona 2010’an de ji aliyê Supaya Pasdaran ve hat girtin. Ew 8 mehan di hucreyên takekesî û di şertên pir giran de li girtîgehên Serdeşt, Seqiz û Sineyê hat girtin û êşkenceyeke giran a fîzîkî dît. Paşê bi tometa ‘serhildanê’ 30 sal cezayê girtîgehê li ser hat birîn.
Metelîb Ehmedyan berê di 5’ê Gulana 2025’an de li dijî redkirina daxwaza wî ya ji bo sekinandina cezayê wî ya ji aliyê dozgerê giştî yê Tehranê ve û bêparhiştina wî ya ji derman û tedawîkirinê, ketibû greva birçîbûnê.
Mutelîb Ehmedyan di salên borî de li girtîgehê nexweşiya penceşêra mîdeyê pêre çêbûye. Ji ber tedawînekirinê 35 kîloyan wenda kiriye. Ew niha di rewşek xirab ya tendirustî û fîzîkî de di girtîgehê de tê ragirtin.
