Li gundê Roboskî yê navçeya Qilaban a Şirnexê di 28’ê Kanûna 20111’an de di encama bombardûmana balafirên şer ên artêşa Tirk de 34 sivîl hatin kuştin, ku 19 ji wan zarok bûn. Di komkujiya Roboskî de ku rayedarên hikumeta wê demê û medya navendî bi gotina ‘qezaya operasyonê’ hewl dan binixumînin, li gel salên di ser re derbas bûne jî lêpirsîneke bi bandor nehate meşandin, berpirsyar nehatin darizandin. Ji bo malbatên ku daxwaza wan a ji bo edaletê bê bersiv hate hiştin, Roboskî bû yek ji nîşaneyên herî giran ên polîtîkayên bêcezahiştinê.
Malbatên Roboskî ku xizmên xwe li ser gorên wan bi bîr anîn ji ANF’ê re axivîn.
EM DIXWAZIN ZAROKÊN ME BI DILREHETÎ RAZÊN
Medîne Urek: Em tenê edaletê dixwazin. Em dixwazin edalet bi cih bê anîn. Beriya 14 salan xizmên me hatin qetilkirin, lê belê edalet bi cih nehat. Birînên me hîn jî teze ne. Weke dayik êdî bêhna me diçike. Em dixwazin edalet bi cih bê anîn û zarokên me bi dilrehetî razên. Em her sal şehîdên xwe li ser gorên wan bi bîr tînin.
YA KU DEWLET LI ME DIKE ZILM E
Sefer Encu: Weke her sal em li ser gora xizmên xwe ne yên hatin qetilkirin. Di ser komkujiyê re 14 sal derbas bûn lê belê edalet nehat. Berpirsyarên vê komkujiya ku dewletê kiriye kî be em dixwazin ku ew bê darizandin. Ya ku dewlet li me dike zilm e. Bendewariya me ji kesî nîne, em tenê edaletê dixwazin.
EM LI BENDA EDALETÊ NE
Vahîde Encu: Li ser gora birayê xwe bi salan e li benda edaletê me. Çar zarokên birayê min hebûn, hemû sêwî man. Me tiştek ji vê dewletê nedît. Ti carî guh nedan daxwazên me. Berpirsyarên komkujiyê dernexistin holê. Dewletê 14 salan daxwaza me ya ji bo edaletê bê bersiv hişt. Ti ji rayedarên rayedarên dewletê rojekê nehat serdana me.
EM DIXWAZIN AŞTÎ BÊ VÊ XAKÊ
Taybet Encu: Em tenê edaletê dixwazin. Heta ku edalet bê em ê têkoşîna xwe dewam bikin. Heta ku berpirsyarên vê komkujiyê bêne darizandin lêgerîna me ya li edaletê wê dewam bike. Em dixwazin aştî bê vê xakê. Lê belê vê dewletê zarokên me û 14 salên me ji me stand. Bila dewlet destpêkê hesabê vê bide. Zarokên me ji ber nanê xwe hatin qetilkirin. Me ev komkujî ji bîr nekir, em ê nedin jibîrkirin.
