Parlamenter Cansû Ozdemîr, piştî êriş û komkujiyên ku di navbera 6-10’ê Çileyê de li taxên Kurdan ên li Helebê hate kirin, ji bo bersivdanê pêşnûme pirsek pêşkêşî hikumeta Elman kiribû.
Di pêşnûmeyê de ev pirs hatibû kirin: “Hikumeta Federal têkildarî êriş û şerê giran ê li ser taxên Helebê yên piraniya şêniyên wê Kurd in, nirxandina xwe kiriye? Eger kiribe ev nirxandin çi ye? Her wiha ji bo bidawîkirina tundiya li Sûriyeyê û parastina sivîlan, wê hikumeta federal bi înîsiyatîf tedbîran werbigire? Eger wê werbigire, ev ê çi bin?”
Hikumeta Elman ev bersiv da:
“Hikumeta Federal bi fikareke mezin nûçeyên rojên dawî yên li ser bûyerên tundiyê yên li bajarê Helebê şopandiye.
Hikumeta Federal ji ber vê yekê peymana agirbestê ya dawiya hefteyê ya derbaswbûyî bi kêfxweşî pêşwazî dike û bang li aliyan dike ku di dema herî kurt de ji nû ve li maseya muzakereyê vegerin.
Hikumeta Federal ev bang rojên dawî hem li pêşiya raya giştî hem jî bi danûstandinên yekser ên bi herdu aliyan re ji aliyên şer re ragihandiye.”
