Êrîş û komkujiyên li ser taxên Kurdan Şêxmeqsûd û Eşrefiyê yên çeteyên hikûmeta veguhêz a Sûriyeyê û dewleta Tirk piştgiriyê dide wan, kete rojeva Senatoya Spanyayê. Endamên senatoyê yên Baskî Elejabarieta Diaz û Josu Estarrona Elizondo, pêşniyarnameyek pêşkêşî Senatoyê kirin, di pêşniyarnameyê de bal kişandin ser êrîşên li ser Kurdan ên li Helebê û bang li Spanyayê kirin ku berpirsiyariyan bigire ser milên xwe.
‘TEVÎ AGIRBESTÊ PÊK HATIN’
Di pêşniyarnameya ku ji bo bersivdayîna hikûmeta Spanyayê hate pêşkêşkirin de bal kişandin ser mezinahiya êrîşên li ser taxên Şêxmeqsûd û Eşrefiyê û hate îfadekirin ku ev êrîş tevî agirbestê pêk hatine. Di pêşniyarnameyê de ev yek hate gotin: ‘’Di encama êrîşan de di navbera nifûsa ku piraniya wê welatiyên sivîl in de mirin, birîndarbûn, koçberiyên bi darê zorê çêbûn û rewşa mirovî bi awayekî cidî xirab bûye.’’
Di pêşniyarnameyê de hate destnîşankirin êrîş piştî biserneketina muzakereyên di navbera rêveberiya Xweser û hikûmeta veguhêz a Sûriyeyê ya cîhadîst de hatine kirin û ev yek hatin gotin: ‘’Di encama hevdîtinên ku di mehên dawîn de li gel beşdarbûna Dewletên Emerîkayê yên Yekbûyî jî dihatin birêvebirin, ji bo taxên li Helebê ku piraniya wan Kurd in nekarîne ewlehiya gel dabîn bikin û lihevkirinên biîstîqrar ên çorçoveyeke siyasî ya mayînde pêk were. Têkçûna lihevkirinên hesas, li qada bajarî ya nifûsa wê zêde rê li ber şer û pevçûnên ji nû ve vekirin.’’
‘WELATIYÊN SIVÎL HATIN HEDEFGIRTIN’
Di pêşniyarnameyê de daxuyaniyên NY’ê yên têkildarî tiştên qewimîne jî hatin bibîrxistin û û ev yek hatin gotin: ‘’Li gorî raporên dawîn ên NY’ê, zêdebûna tundiyê bi awayekî rasterast bandor li welatiyên sivîl kiriye; gelek kesan jiyana xwe ji dest dane, birîndar bûne, bi darê zorê hatine koçberkirin û xwegihandina xizmetên sereke de astengî çêbûne. Dijminahî ûtedbîrên ewlehiyê yên hatine standin, xwegihandina herêmên lê şer û pevçûn hene, dijwar kirine.’’
‘PIŞTGIRIYA TIRKIYEYÊ’
Di pêşniyarnameyê de hate destnîşankirin ku êrîş bi piştgiriya dewleta Tirk hatine kirin û ev yek hatin gotin: ‘’Dewleta Tirk, di van êrîşên li ser gelê Kurd de piştgirî daye hikûmeta Sûriyeyê. Her wiha tê zanîn ku di navbera PKK û Tirkiyeyê de pêvajoyeke aşitiyê tê birêvebirin û geşedanên li Sûriyeyê dikarin bandoreke neyînî li vê pêvajoyê bikin.’’
DAXWAZ Û PIRS
Senatoran herî dawiyê ji bo Hikûmeta Spanyayê bersiva wan bide ev pirs pêşkêş kirin: ‘’Hikûmeta Spanyayê, têkildarî bomberdûmanên artêşa Sûriyeyê yên li ser taxên ku piraniya nifîsa wan Kurd in û encamên wê yên li ser welatiyên sivîl nirxandineke çawa dike?
Hikûmeta Spanyayê têkildarî rewşa dawîn û biserneketina muzakereyên di navbera hikûmeta Sûriyeyê û aktorên Kurd de ku DYE jî beşdar bûye, xwedîyê kîjan agahiyan e?
Hikûmeta Spanyayê, têkildarî pêvajoyên aşitiyê yên bandorê liKurd dike û rewşa heyî ya diyalogên siyasî de –bi taybetî jî di çarçoveya hewlên muzakereyên li Tirkiyeyê û pêvajoya muzakereyên di navbera hikûmeta Sûriyeyê û aktorên Kurd de ku a niha sekiniye de- nirxandineke çawa dike?
Her wiha ji bo têkariya jinûvedestpêkirina van pêvajoyan hewlên dîplomatîk ên şênber ên Spanya bi rê ve dibe yan jî wê di demên pêş de bi rê ve bibe, çi ne?’’
