Xelkê Kantona Cizîrê bi hemû pêkhateyên xwe ve îro li bajarê Qamişlo ji bo piştgirî dayîna QSD’ê û xwedî derketina banga serferberiyê a Rêveberîya Xweser a Demokratîk, meşek girseyî lidar xist.
Meş bi dirûşmeya ‘’Bijî berxwedana QSD’’ û bi pêşengtiya Hêzên Ewlekariya Hundirîn li pêşiya çarxerêya Sewame destpê kir û heta çarxerêya Efrînê dom kir.
Dayîkên şehîd û şervanan nêrînên xwe di meşê de bi ANF’ê re parve kirin û diyar kirin ku ew ê heta dawî li pişta hêza xwe bin.
Di despêkê de dayîka bi navê Fikriye Reşîd axivî û wiha got, ‘’Divê îro em dijmin bişkînin ji bo bizanibe ku gelê Kurd têk naçe. Eger îro ji me were xwestin em ê jî çeka xwe rakin û berê xwe bidin kêleka zarokên xwe, em ji top û balafirên Erdogan natirsin. Heta ku rojek di jiyana me de mabe em ê tim piştgiriya zarok û hêzên xwe bikin. Em ê mafê xwe bi xwe bistînin. Heta ku em welatê xwe azad nekin em ê tim ser pîya bin. Dewletên navnetewî li kuderê ne, ewqas sal di vir de ne çi kirine ji bo me. Em nema kesî qebûl dikin, em ê mafê xwe bi destê xwe bistînin.’’
Dayîka bi navê Şaha Mihemed axivî û diyar kir ku ew ê her tim li pişta hêza xwe bin heta serkeftin pêk were û wiha domand, ‘’Em îro li pişt QSD û Asayîşa xwe ne, em ê welatê xwe rizgar bikin, em ê DAÎŞ û Colanî têk bibin. Gele kurd îro ji 7 heta 70 salî li ser piyan e û em ê heta dawî li berxwe bidin.’’
Herî dawî dayîka bi navê Ayşe Mihemed jî silav ji berxwedaniya hêzên QSD û Asayîşê re şand û wiha got, ‘’Çekdarên El Şera hatin bi tang û topên xwe êrîşên xwe li dijî me pêk anîn, lê em ne şikestin. Hêzên me bi çekên xwe îro li ber xwe didin û serî natewînin, moralê me bilind e. Em îro ji bo zarokên xwe yên ku ji aliyê hikumeta Şera ve tên qetilkirin, rabûne ser piyan. Em ji wan çeteyan re dibêjin, hûn nikarin QSD’ê têk bibin, QSD xurt e, bila cîhan giştî bizanibe em kî ne.’’
