Hevseroka Partiya Yekîtiya Demokratîk (PYD) Perwîn Yusif, der barê êrîşên HTŞ û komên çete yên ser bi dewleta Tirk ên li ser Bakur û Rojhilatê Sûriyeyê de di televîzyona Sterk TV’ de daxuyanî dan.
Perwîn Yusif diyar kir ku pêvajoya diyalogê berdewam dike û wiha got, “Di deqeyên pêş de Birêz Mazlum Ebdî dê der barê geşedanên rû dane de daxuyaniyê bide. Muhatabê yekser ê van geşedanan Birêz Mazlum Ebdî ye. Hevdîtin û civînên pêwîst hatin kirin. Agahiyên der barê çawabûna peymanê de werin parvekirin. Hikûmeta Şamê hin xal parve kirin lê binexalên wan xalan hene. Projeya me ya birêvebirina Sûriyeyê bi awayekî demokratîk heye. Em ji bo vê gelek sal in têdikoşin. Ji bo biratiya gelan siyaset hate kirin. Kesên li hemberî me, xwe li ser komkujî û xwînê ava dikin. Sûriyeyeke yekperest tê ferzkirin. Ji roja ku hatine ser erkê û vir ve ji bo vê hewl didin. Bi destê eşîran û çeteyên wan, li ser gelên Bakur û Rojhilatê Sûriyeyê êrîşeke mezin dan destpêkirin.”
