Li Apartmana Sebatê pankarteke ku wêneyê Hrant Dînk li ser bû û li ser “Em li vir in Ahparîg” hatibû nivîsandin, hate daliqandin.
Di dema bîranînê de sloganên “Em hemû Hrant in, em hemû Ermenî ne”, “Bijî biratiya gelan”, “Bila yên ku fermana kuştinê dane bên darizandin”, “Ji şer re na, aştî niha tavilê”, “Ev hîn destpêk e, têkoşîn berdewam dike”, “Azadî ji girtiyên siyasî re” û “Yên ku kujeran diparêzin şirîkên sûc in” hatin berzkirin.
Di bîranînê de ewil nameya Alîkara Şaredarê Şîşliyê Ebru Ozdemir a ku di Girtîgeha Sîlîvriyê de girtî ye hate xwendin. Ozdemir di nameya xwe de wiha got: “Hrantê delal, cihê ku tu lê ketî êdî ji navnîşanekê derket û bû cihê ku ev welat ji rûbirûbûna pê re direve. Dostên te her sal daxwaza dadweriyê dikin. Ev daxwaz bi demê re lawaz nebû, berovajî zêdetir bû. Min li ser wî peyarêkê fêrî bi bêdengî axaftinê bûm. Îro ez ne li wir im, ez van rêzan ji Sîlîvriyê dinivîsînim. Em hîn nebûn, em dest jê bernadin; em navê te û têkoşîna te mezin dikin.”
Şaredarê Şîşliyê Resul Emrah Şahan ê ku di Girtîgeha Sîlîvriyê de girtî ye jî di nameya xwe de wiha got: “Hrant Dinkê delal, birayê min ê ku min qet nas nekiriye. Nehesibînin ku ez ne li cem we me, ez jî li ber Apartmana Sebatê me. Ez bi dostên ku her sal tevî hêrs û şer, bi hestên biratiyê tên cem hev re me. Em ê li ser şopa Hrant, li pey dadweriyê bin.”
‘EM BI RIK Û SEBAT LI VIR IN’
Di nameya Çigdem Mater a ji berxwedêrên Geziyê ku di Girtîgeha Jinan a Bakirkoyê de girtî ye de jî ev îfade cih girtin: “Hrantê delal, tu ne yê yekem bûyî. Di vê welatê ku kujerên te bêyî şerm û sûcdarî hîs bikin, bêyî hesab bidin jiyana xwe berdewam dikin de, em bi rik û sebat li vir in. Mafê me nîn e ku em bêhêvî bin. Îro rojek e ku em wê hêviyê bi êş bi bîr tînin.”
Di nameya Osman Kavala yê ku di Girtîgeha Sîlîvriyê de tê girtin de jî hat destnîşankirin ku ramanên Hrant Dînk û xeta weşanê ya Agosê ku bi salan e didome, ji bo têkoşîna edaletê rê nîşan dide. Kavala diyar kir ku baweriya wan a ku dê cinayeta Hrant Dînk bi temamî ronî bibe û edalet pêk bê, berdewam dike.
