Ev zêdeyî 10 roj in ji aliyê çeteyên dewleta Tirk yên bi ser hikumeta demkî ya Sûriyeyê ve êrîşeke qirkirinê li ser Bakur û Rojhilatê Sûriyeyê tê meşandin. Kobanê niha di nava çemberê de ye. Bi hezaran şêniyên Kobanê daketin qadan û bi coş û moral parastina ax û welatê xwe dikin.
Bi hezaran ciwan li serê her kolanekê, li nava her gundekî bi stranan govendê li dora agir digerînin û nobetê digirin. Êrîş her diçe li ser Kobanê zêde dibin, israra berxwedana gel her diçe gurtir dibe. Şêniyên berxwedêr ji ANF’ê re axivîn û gotin, sala 2014’an çawa li Kobanê DAÎŞ têk çû, wê car din ev çete têk biçin.
‘EM DEV JI KOBANÊ BER NADIN Û EM Ê WAN TÊK BIBIN’
Jina ciwan a bi navê Ehlam Ebdî diyar kir ku çi dibe bila bibe ew dev ji Kobanê ber nadin û got, “Em ê bi şev û roj parastina gelê xwe bikin û li her derê seferber bibin. Çawa ku me çeteyên DAÎŞ’ê li Kobanê têk bir, em ê careke din jî li vir wan têk bibin. Em ê bi gotina Zehra Penaber a ‘Em ji Mirinê Mezintir in’ û bi wê ruhî li ber xwe bidin.”
Ehlam anî ziman ku ew ê bi şev û roj li ser piyan bin û wiha axaftina xwe berdewam kir: “Ji bo parastina welat û bajarê xwe em ê her li ser piyan bin. Em bang li ciwanên her çar parçeyên Kurdistanê dikin ku êdî rabin ser piyan û bi hev re welatê xwe biparêzin.”
Welatiyê bi navê Elî Îsa jî diyar kir ku ew ê heta dawiyê bi hêza xwe re bin û got, “Em hemû li pişt hêza xwe ne, em dev ji gelê xwe û hêza xwe ber nadin. Em ê heta dawiyê xwedî li wan derbikevin. Berxwedaniya me ya 2014’an diyar e, ji du taxan bû dawiya têkbirina terorê. Em her dibêjin em xwişk-biratiya gelan diparêzin, lê ev çeteyên hov vê yekê napejirînin, ji lewra jî êrîşên xwe kirin.”
BERXWEDAN JIYAN E
Elî di dawiyê de bal kişand ser berxwedaniya şervanan û got, “Em ê bi yek dilî bi hevre li hemberî van çeteyan rabin ser piyani. Wê ti kes nekare destidêrjiyê li ser destkeftiyên me bike, em ê destê wan jê bikin. Berxwedan her tim jiyanê diafirîne. Ji lewra jî Berxwedan Jiyane.”
