Mediapart û L’Humanité (Fransa), Le Soir û La Libre Belgique (Belçika), Frankfurter Rundschau (Wlmanya), The Independent (Îngilistan), L’Orient-Le Jour (Lubnan) û weşangeriya civakî ya Spanyayê RTVE û gelek saziyên din ên weşanê di nava îmzevanan de cih girtin. Saziyên medyayê ji bo piştevaniya bi rojnamevanan re û ji bo şikandina bêdengiyê, rûpelên xwe yên destpêkê reş kirin.
Li gorî RSF’ê ji 7’ê Cotmeha 2023’yan û vir ve li Xezeyê zêdeyî 210 rojnamevan hatin kuştin, ji vane herî 56 ji aliyê artêşa Îsraîlê ve rasterast hatin hedefgirtin yan jî dema li ser wezîfeya xwe jiyana xwe ji dest dan.
Tenê di meha Tebaxa îsal de, di sê êrîşên Îsraîlê de 11 rojnamevan mirin. 25’ê Tebaxê du guleyên top ên li kompleksa nexweşxaneya El Nasir a li navenda Xezeyê ketin, bûn sedemê mirina 20 kesan. Di nava kesên mirin de, 5 rojnamevanên ajansên navneteweyî yên mîna Reuters û Associated Press jî hebûn.
RSF û Avaaz bang li raya giştî ya navneteweyî kir û destnîşan kir ku parastina rojnamevanan hem ji bo azadiya çapemeniyê hem jî ji bo rewşa sivîlan ji cîhanê re were ragihandin, girîng e.
SÊ DAXWAZ
Saziyên medyayê yên ku tevlî vê kampanyaya di meha Hezîranê de ji aliyê RSF û Komîteya Parastina Rojnamevanan (CPJ) hate destpêkirin bûne, sê daxwazan dikin:
– Em êrîşên artêşa Îsraîlê yên li Xezeyê li dijî rojnamevanan û kuştina wan, şermezar dikin û daxwaz dikin ku ev sûc bêceza nemînin.
– Em dixwazin ku rojnamevanên Fîlîstînî yên bixwazin, bila demildest bên tehliyekirin.
– Em daxwaz dikin ku rayedarên Îsraîlê destûr bide ku çapemeniya navneteweyî bi rengekî serbixwe xwe bigihîne Xezeyê.
Bi mayîna çendek rojan a ji rûniştina 80’an a Lijneya Giştî ya NY’ê re, rêxistinên medyayê bang li civaka navneteweyî kir ku bi rengekî xurt bikeve nava liv û tevgerê û bang li Konseya Ewlehiyê ya NY’ê jî kir ku ji bo rawestandina êrîşên li ser rojnamevanên Fîlîstînî berpirsyarî bigire ser xwe.
