Şêniyên bajarê Qamişloyê ji duh ve ji bo parastina herêma xwe seferber bûne. Şêniyan diyar kir ku vebijêrka wan a yekane berxwedan e.
Mihemed Becar Çeto got: “Em ne hêza parastinê ne û ne jî hêzeke leşkerî ya fermî ne. Me çek rakiriye da ku gelê xwe û rûmeta xwe ji êrişan biparêzin. Şer li ser me hatiye ferzkirin, ji ber vê yekê em ê heya dawiyê li ber xwe bidin û teslîm nabin.”
Mihemed Çeto bang li gelê Kurd ê çar aliyên Kurdistanê kir ku piştgiriya Rojava bikin û got: “Hêza rasteqîn ji xwîna şehîdan tê girtin. Gel dê heya dawiyê li ber xwe bide û çete çawa berê têk çûn dê dîsa têk biçin.”
Hêvîn Îbrahîm jî da zanîn ku Rojava li pêşberî xetereyeke rasteqîn e û ev li gotinên xwe zêde kirin “Kurdistanî li çar aliyên Kurdistanê ji bo me rabû ser pêya. Em tu carî natirsin. Em ê heya dawiyê li ber xwe bidin. Em ê asta têkoşînê mezintir bikin. Em ê çek rakin û gelê xwe biparêzin.”
Hêvîn Îbrahîm destnîşan kir ku biryara wan berxwedan e û got, an jiyaneke bi rûmet an jî mirineke bi rûmet, vebijêrka sêyemîn tune ye.
Mihemed Kermo jî banga yekitî û têkoşîna hevpar li çar aliyên Kurdistanê kir û got, piştgiriya hundirîn mîsogeriya parastina hebûna Kurd e.
Kermo gelê Kurd serî natewîne û dê piştgiriya bi şervanan re bidomîne.
Feysel Hecî Nayîf jî diyar kir ku wî ji bo parastina gel û mafê wê çek rakiriye û banga yekitiyê li hêzên Kurd kir. Her wiha got, mîna berê her êrişek dê bi îradeya yekbûyî ya gel were bersivandin.
