Xelkê Şengalê li dijî êrişên li ser Rojavayê Kurdistanê bi hemû beşên xwe di tevgerê de ye. Piştgiriyek jî ji Kolektîfa Saza Êzî ji bo berxwedana Rojavayê Kurdistanê hat. Dengbêj û tembûrvanên Êzidî bi nîşandana helwesta xwe û gotinan stranê piştgiriya xwe ya ji bo Rojavayê Kurdistanê nîşan dan. Hunermend diyar kirin, ewê bi tembûr û stranên xwe piştgiriyê bidin berxwedanê.
Daxuyaniya Kolektîva Saza Êzî li navenda Çand û Hunerê ya Şengalê ji aliyê dengbêj û tembûrvan Berces Xelef û Îdo Çêlkî ve hate dayîn. Dengbêj û tembûrvan bi tembûra xwe daxuyanî dan.
Dengbêj Berces Xelef destpêkê berxwedana şervanên QSD’ê silav kir û got: “Her bijî egîdên Rojava ku şereke mezin didin. Em jî bi deng û tembûra xwe bi gelê xwe yê Rojava re ne. Çeka herî mezin ev tembûre, em jî bi tembûra xwe li gel wanin. Heya dilopek xwîn di laşê me de heye, emê li pişt wan bisekinin. 2014’an xelkê me bi germî pêşwazîkirin. Îro jî wextê wê ye em jî vî barê wan ê giran hinekî bigirin ser milê xwe. Em hêvî ji Xwedê dikin, gelê me timî serkeftîbe. Her bijî çar parçeyên Kurdistanê. Her bijî xortên Êzidxana delal. Hezar rehm li wan şehîdên ku xwîna xwe ji bo parastina axa me dane be.”
Hunermend Îdo Çêlkî jî peyameke kurt da û got: ‘‘Em êşa Rojava baş dizanin, ji ber tu kes bi qasî Şengalê û Êzidiyan ferman nedîtiye. Hêvî dikin ev şer raweste û tifaq çêbibe. Bila şerê li dijî mazlûman bisekinînin û ji me dûr bixin. Silavê me ji xelkê me yê Rojava re heye. Ew gelek tişt ji bo me kirin. Emê bi stran û tembûra xwe li pişt wan bisekinin.”
Piştî axaftinên di daxuyaniyê de hunermend Îdo Çêlkî li tembûrê xist dengbêjê navdar ê Şengal Mirad jî stranek ji bo piştgiriya Rojava got.
Endamê Kolektîva Saza Êzî Kazim Şêxmûs jî diyar kir, ew weke dengbêjên Şengalê li gel berxwedana Şengalê ne û got: “Em jî weke dengbêjên çiyayê Şengalê li pişt gelê xwe yê Rojava ne. Şer were ber deriyê me em jî amade ne. Çawa xelkê Rojava 2014’ê gelê Şengalê pêşwazî kir, emê jî weke Şengal tişta bikeve ser milê me bikin.”
