Gîwara Dêrîk a ku li eniya şer a Hesekê daxuyanî da û got ku ev welat axa wan e û wiha domand: “Ev welatê me ye. Em ê axa xwe biparêzin. Heta dilopa xwîna xwe ya dawî, heta nefesa xwe ya dawî em ê berxwe bidin.”
Dêrîk diyar kir ku hêza xwe ji gel digirin û wiha pê de çû: “Gelê me li pişt me be, em ê qet gavekê paş ve neavêjin. Em ê berxwedanê bikin, ji ber ku ji berxwedanê pê ve çareya me tune ye.”
Şervanê YPG’ê bal kişand ku ev yek têkoşîna hebûn û tunebûnê ye û bang li hemû gelê Kurd kir: “Em wek gel şer naxwazin. Lê ger şer were ber deriyê me, em ê xwe biparêzin. Em ê li ber tu kesî serê xwe netewînin.”
Dêrîk bibîr xist ku gelê Kurd di dîrokê de gelek berdêl daye û wiha bi dawî kir: “Em gelekî ku xwedî hezaran şehîdan in. Em ê têkoşîna şehîdên xwe li erdê nehêlin. Bi qasî ku hêza me tê em ê berxwe bidin.”
