Endamê Fermandarîya Giştî ya QSD’ê Mehmûd Berxwedan, li ser dorpêçkirina Kobanê ji aliyê HTŞ-DAÎŞ û komên çete yên girêdayî dewleta Tirk a dagirker ve û li ser salvegera rizgarkirina Kobanê ji çeteyên DAÎŞ’ê daxuyaniyek da.
SALVEGERA TÊKÇÛNA DAÎŞ’Ê YA 11 SAL BERÊ YA LI KOBANÊ NÊZÎK DIBE
Berxwedan bang li gelê Kurd kir û bal kişand ser girîngiya dîrokî ya Berxwedana Kobanê ji bo mirovahiyê û wiha got:
“Gelê me yê bi rûmet, çend rojan din em ê salvegera têkçûna DAÎŞ’ê li Kobanê pîroz bikin. 11 sal berê, ji her çar perçeyên Kurdistanê mêr û jinên Kurd li Kobanê li hev civiyan û hêza herî tarî ya cîhanê, çeteyên DAÎŞ’ê têk birin. Bêguman, ev berxwedana dîrokî bi berdêlekî giran bi ser ket. Di 26’ê Çileya 2015’an de, bi seya Berxwedana Kobanê hemû mirovahî ji teroreke mezin rizgar bû.”
LI BER ÇAVÊN CÎHANÊ ÇÊBÛNA ÊRÎŞAN TALÎHSÎZIYEKE MEZIN E
Berxwedan bal kişand ser vê yekê ku îro, di salvegera vê berxwedana rûmetdar de, hêzên tarî yên domdariya DAÎŞ’ê careke din dixwazin Kobanê dagir bikin û wiha got: “Ev êrîşa hovane li ber çavên hemû cîhanê tê kirin, ev talîhsîziyeke mezin e. Wekî 11 sal berê li bajarê Kobanê me sond xwaribû û soz dabû gelê xwe ku em ê ji bo rûmetê şer bikin, îro jî biryardariya me didome.”
EV BERXWEDANEKE TOPYEKÛN E
Berxwedan bal kişand ser vê yekê ku HTŞ-DAÎŞ û bi hezaran çeteyên çekdar, bi piştgiriya hêzên herêmî û bêdengiya cîhanê dixwaze îradeya gelê Kobanê bişkîne û wiha dewam kir:
“Ji bo vê armancê, ji rojan berê av, elektrîk û înternetê li Kobanê hatiye qutkirin. Her kes bizane ku niha li Kobanê bi sedan hezar sivîl di bin dorpêçeke giran de ne. Wekî hêzên ku rûmeta gelê Kurd diparêzin, em ê erka xwe heta dawiyê bi cih bînin. Wekî tê zanîn ev têkoşîn û berxwedaneke topyekûn e.”
BIBIN DENGÊ KOBANÊ!
Berxwedan bang li hemû gelê Kurdistanê, Kurdên li derve û aşîtîxwazên cîhanê kir û wiha got:
“Çawa ku hûn di sala 2015’an de li hemû cîhanê bûn dengê Kobanê, îro jî bi heman hestê divê hûn tevbigerin û rabin ser piyan. Ya ku îro tê kirin ne tenê dorpêçeke leşkerî ye. Hêzên tarî dixwazin bi sedan hezar sivîlên li Kobanê ceza bikin.”
EM Ê FERMANÊ ZÎYAD Û DENÎZ BI CİH BÎNIN
Berxwedan daxuyaniya xwe bi van gotinan dewam kir:
“Gelê me yê rûmetdar; li her qadê rabin ser piyan û bi hev re bipirsin:
Ma çavên hiqûqa navneteweyî nabîne?
Parêzvanên demokrasî û mafên mirovan çima bêdeng dimînin?
Bêdengiya li hember dorpêça Kobanê dê bibe sedema komkujiyên girseyî.
Cîhan baş bizane ku heta mirinê em ê rûmeta gelê xwe biparêzin. Jixwe fermanê dawî yê hevalên me Zîyad û Denîz jî ev bû. Lê divê were zanîn ku mirina herî xerab mirina ku ji bêdengiya mirovahiyê çêdibe ye. Parastina Kobanê erk û exlaqê her mirovê xwedî wicdan e. Îro Kobanê careke din ji bo mirovahiyê şer dike.”
