Meclîsa Xweser û Demokratîk a Şengalê (MXDŞ), bi daxuyaniyekê nerazîbûn nîşanî veguhestina çeteyên DAÎŞ’ê ji Sûriyeyê bo Nînowa ya Iraqê da û got ku hebûna çeteyan a li vê herêmê di serî de li ser Êzidiyan, xeteriyek mezin li ser hemû pêkhateyan çêdike.
Daxuyaniya MXDŞ’ê bi vî rengî ye:
“Em şer û aloziyên li saheya Sûriyeyê ku hevsînorin ji nêz ve dişopînin. Ji ber dema 2014’an DAÎŞ êrîşê Rojava kir, êrîşê Şengalê jî kiribû. Lewma di dema êrîşên DAÎŞ’ê de çarenûsa Rojava û Şengal wekhev bû. Lê Şengal bi piştgiriya gel û şervanên wan, herêm ji dest çeteyên DAÎŞ’ê hatibû rizgarkirin. Çeteyên ji Iraqê reviyan saheya Sûriyeyê ji aliyê Hêzên Sûriyeya Demokratîk (QSD) ve hatibûn bê bandorkirin û têkbirin. Bi hezaran çeteyên metirsîdar ên di qirkirina gelan û jinan de cih girtibûn, ji aliyê şervanan ve hatibûn girtin û li girtîgehên cûda hatibûn bicîhkirin.
Piştî erêkirina hêzên navnetewî HTŞ û komên çete yên ser bi dewleta Tir destpêkê li Helebê êrîşên qirkirinê li dijî gelê Kurd û civaka me ya Êzidî pêkanîn, wan qetil kirin, sûcên şer û mirovî li dijî jinan, gel û şervanan kirin. Paşê jî bi rêvekirina van hêzan berê xwe dan herêmên Bakur û Rojhilatê Sûriyeyê û xwestin van girtiyan hemû ji girtîgehê bidin revandin.
Li gorî nûçeyên ku derdikevin gelek çete serbest hatine berdan, derdora 7 hezar ku ji vana tenê hezar û pênsed çete Iraqî ne, yên din tev biyanîne bi erêkirina hikûmeta Sûdanî derbasê Iraqê tênekirin. Bicîhkirina van DAÎŞ’iyên xeternak ku li Iraq û Kurdistanê li ser ewlehiya herêmê xeteriyeke mezin çêdikin, fikarên me zêde kiriye. Herçend were gotin, ew ê ne demdirêj bimînin jî, ew weke bombeyeke ne teqiyayî ya li nava dilê herêma me de ne. Ji bo gel û baweriyên cûda yên li Iraqê xeteriyeke mezin çêdikin. Hem çeteyên Iraqî û hem jî çeteyên biyanî radestê dewleta Iraqê hatine kirin. Nayê zanîn çi planek li ser van çeteyan heye. Çeteyên biyanî divê demildest radestê welatên wan werin kirin, li van welatan bi amadebûna gelên mexdûrên DAÎŞ’ê werin darizandin.
Em weke civaka Êzidî û bi taybet jî Rêveberiya Xweser û Demokratîk a Şengalê hebûna wan çeteyan ya li Iraqê ji bo ewlehiya xwe weke xeteriyeke mezin dibînin. Em bi tu awayî qebûl nakin ev çete li parêzgeha Nînowa werin bicihkirin. Hebûna wan wê ji bo hemû gelên cûda yên Mûsilê (gelên Mesîhî, Êzidî, Şebek, Şîe, Kurd) bibe xeteriyeke mezin. Divê ev yan ji Iraqê bi temamî werin derxistin, anjî li herêmên dûr ji herêmên me werin bicîhkirin û di demeke herî nêz de bi amadebûna hemû gelên di qirkirinên re derbasbûne werin darizandin. Gelên me û jinên Êzidî divê biryarê derbarê çarenûsa wan de bidin, ne tu dewlet an jî hêzeke navnetewî. Divê ev tawanbar werin cezakirin ku careke din nekarin serî rakin û sûcên din ên dijî mirovahiyê pêk bînin. Pêwîste dewleta Iraqê jî guh bide gelên li Iraqê dijîn û gel, derbarê van çeteyan de biryara dawî bidin. Yan wê dewleta Iraqê, ji derketina her pirsgirêkekî rû bide berpirsyar were girtin.
Em bang li hemû gelên li herêma Nînowayê û giştî Iraqê dijîn dikin, di vê mijarê de xwedî helwest bin, rê nedin wek çawa li Sûriyeyê kirin li vir jî bikin. Divê dewletên qirkirina Êzidiyan naskirine ji bo darizandina van çeteyan berpirsyarî bigirin û xwedî li biryara xwe derbikevin.
Me li Sûriyeyê dît bi hezaran şaneyên razayî yên DAÎŞ’ê bi destê hêzên navnetewî, dewleta Tirk û yên herêmî hatine amadekirin û niha ketine tevgerê. Ji bo ev li Iraqê çênebe divê dewlet demildest li seranserê Iraqê tedbîrên pêwîst bigire. Dîsa gelên herêmê li hember her rewşeke muhtemel parastina xwe teslîmê tû hêzeke biyanî neke, bihevre parastina ax û gelê xwe bikin.
Divê li hember gefên Wezîrê Karên Derve yên Dewleta Tirk Hakan Fîdan û komên çete Êzidî werin parastin. Bang li hemû rizgarbûyînê ji destê DAÎŞ’ê yên li derveyî welat û li welat dijîn dikin, dîsa hemû kesayet û çalakvanên Êzidî dikin, di asta navnetewî de li dijî hewldanên qirkirinê yên nû yên çeteyan bikevin tevgerê, ji bo parastina destkeftiyên civaka xwe erka dikeve ser milê xwe pêk bînin.”
