Kamûran Taş ê ku li Girtîgeha Girtî ya Tîpa T ya Tokatê dihat girtin, piştî 31 salan hate berdan. Taş piştî ji girtîgehê hate berdan, çû Dîlokê ku malbata wî lê ye. Federasyona Komaleyên Piştevaniyê ya bi Malbatên Girtî û Hikûmxwaran re (TUHAD-FED), Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) û Tevgera Jinên Azad (TJA) serdana Taş kirin.
Taş di dema serdanê de axivî û diyar kir ku li girtîgehan baweriya ji bo pêvajoya ku bi banga Rêber Apo hate destpêkirin, xurt e. Taş wiha got, “Hemû heval felsefe û manîfestoya Rêbertî bi hestiyarî û baweriyeke mezin qebûl dikin. Lêhûrbûneke xurt heye. Ez di wê baweriyê de me ku wê tevkariyên wî xurt be. Hêviyên ji bo pêşerojê pir xurt in. Silavên hemû hevalan ji her kesê re heye.”
Taş bal kişand ser binpêkirinên mafan ên li girtîgehan û diyar kir ku girtiyên ku pirsgirêkên wan ên tenduristiyê heye û wan dişînin sirgûnê hene û pêkanînên wekî dirêjkirina cezayan dewam dikin. Taş got, “Em dizanin ku ev binpêkirin ji ber çi têne kirin. Dixwazin îradeya me bişkînin. Lê heta niha encamê negirtin. Ji ber ku baweriyeke pir xurt heye. Heta ku ev helwest dewam bike, wê têkoşîn bi ser bikeve.”
Taş bilêv kir ku dilsoziya girtiyan ya bi têkoşînê re di asteke bilind de ye û wiha berdewam kir: “Felsefeya Rêbertî heta dawî qebûl dikin. Me ji Kurdên neyî, derbasî Kurdên ku her kes behs dike bûn. Lê ev ne têrker e; pêwîstî bi Kurdên azad hene.”
DI DERBARÊ KAMÛRAN TAŞ DE
Kamûran Taş di Mijdara 1994’an de li navçeya Tozan a Îdirê hate binçavkirin. Di 4’ê Mijdara 1994’an de ji aliyê Dadgeha Ewlehiyê ya Dewletê ya Erzîncanê ve cezayê muehebetê lê hat birîn. Taş, li girtîgehên Erzirom, Elbîstan, Mîdyad û Tokatê ma û piştî girtina xwe ya 31 salan hate berdan.
