Parlamentera Agiriyê ya dema beriya niha ya ji HDP’ê Dîlan Dîrayet Taşdemîr bi wesîleya 8’ê Adarê Roja Jinên Kedkar ên Cîhanê ji ANF’ê re axivî. Dîlan Taşdemîr pênaseya “Jin hêza dehfdanê û parçeyekî herî azad ê entegrasyona demokratîk e” ya Rêber Apo nirxand û işaret bi têkiliya diyalektîk a navbera azadiya jinê û avakirina civaka demokratîk kir.
‘PÊNGAVEKE XWESER KU MESELEYA JINÊ DIKE ESAS’
Dîlan Taşdemîr anî ziman ku nêzîkatiya Rêber Apo ya ku azadiya jinê dike navenda azadiya civakî, xwedî asteke şoreşgerî û dîrokî ye û destnîşan kir ku Tevgera Azadiyê ya Kurd di vê mijarê de mînakeke xweser diyar dike.
Taşdemîr ragihand ku pirsgirêka jinê ne tenê meseleyeke rojane ya newekheviyê ye, di heman demê de yek ji nakokiyên herî bingehîn ê dîrokê ye û got, “Heta ku pirsgirêka Kurd neyê çareserkirin mirov nikare qala azadî, demokrasî û wekheviyê bikin. Rêbertî bi metafora ‘xencera li piştê hatiye xistin’ pirsgirêka jinê pênase dike û destnîşan dike ku heta rûbirûyê vê meseleyê neyê civak nikare azad bibe.”
Dîlan Dîrayet Taşdemîr anî ziman ku bi paradîgmaya Rêber Apo re tevgera jinên Kurd di nava pêncî salên dawî de veguherînek afirand û got, “Li cografyayekê ku avaniya serweriya mêr û kevneşop lê xurt e, pêşengiya jinê guherîneke gigrîng pêk anî. Mesafeya ku civakên din dibe ku sed salî bimeşe, civaka Kurd di demeke gelekî kurt de meşiya. Ev pêvajo hîn neqediya ye, lê belê dînamîkeke girîng a veguherînê ava bû.”
‘KUŞTINA JINÊ BÎLANÇOYEKE ŞER E’
Dîlan Taşdemîr ragihand ku tundiya li jinê li tevahiya cîhanê gihîştiye asteke cidî, bal kişand ser kuştina jinan ku li Tirkiye û Ewropayê zêde bûye û got, “Hefteya derbasbûyî li Tirkiyeyê di nava rojekê de 6 jin hatin kuştin. Ev yek bîlançoyeke şer e.”
BANGA JI BO TEVLÎBÛNA XURT A LI ÇALAKIYÊN 8’Ê ADARÊ
Dîlan Dîrayet Taşdemîr işaret bi girîngiya sembolîk a 8’ê Adarê kir û got, “Hin hîn jî bi daxwaza mûçeyê wekhev û wekheviyê li qadan e. Hîn jî li dijî tundî, destdirêjî, destavêtin û komkujiyan têdikoşin. Herî zêde jin û zarok berdêla giran a şer didin. Têkoşîna jinê ne tenê azadiya nasnameya jinê ye, di heman demê de li dijî serweriya mêr û siyaseta şer têkoşîneke guherînê ya hevgirtî ye.”
Dîlan Taşdemîr ragihand ku li gel şerê li Rojhilata Navîn hêviya civaka demokratîk li Kurdistanê mezin bûye, divê jin di vê pêvajoyê de bi rola pêşengiyê rabin û got, “Hêvîdar im ku di 8’ê Adarê ya pêş de dawî li şer, qirkirinê bê; Kurdistaneke hîn demokratîk, Tirkiyeyeke hîn demokratîk û cîhaneke wekhev ava bibe. Lê belê hêvî têrê nake; divê mirov li qadan bin, dengê xwe bilind bikin.”
Dîlan Dîrayet Taşdemîr bang li jinan hemûyan kir ku bi xurtî tevlî çalakiyên 8’ê Adarê bibin û têkoşîna xwe mezin bikin.
